21. 8. 2023: В Лютинї припомянули собі 35 років од установлїня базилікы мінор

На Маріяньскій горї зышли ся тісячі людей.

Почас вікенду, 19-го і 20-го авґуста 2023-го року, на найвекшім путницькім місцї ґрекокатоликів на Словакії – в Лютинї, одбыв ся архієпархіалный одпуст з нагоды праздника Успенія Пресвятой Богородіцї.

Як інформовав Михал Павлишиновіч, говорця Пряшівской ґрекокатолицькой архієпархії, духовенство і віруючі собі на тогорочнім одпустї припомянули і 35-ту рочніцю установлїня містного храму на базиліку мінор.

Одпуст за участи трёх єпіскопів

Богатый духовный проґрам одпусту быв приготовленый як традічно на двох місцях – в базиліцї мінор долов у селї, а так само на Маріяньскій горї над селом, де перед 172-ма роками зъявив ся святый Николай бідній вдові Зузанї Фекете.

Главным пунктом проґраму успеньского одпусту в Лютинї была недїльна торжественна архієрейска літурґія, яку одслужыв владыка Петро Руснак, апостольскый адміністратор Пряшівской архієпархії і братїславскый єпарха. Вєдно з ним служыли емерітный пряшівскый архієпіскоп і митрополіта Йоан Бабяк, братїславкый помічный єпіскоп Мілан Лах, десяткы священиків і діаконы із вшыткых єпархій на Словакії.

Проповідь на торжественній літурґії тримав архімандріта Ярослав Лайчіак, протосінкел Кошыцькой єпархії.

Співом торжество в Лютинї допроводили Храмовый хор блаженого священомученика Павла Петра Ґойдіча з Воронова над Топлёв, молодежный Хор святых Петра і Павла з Мільпоша, і співачка Моніка Кандрачова.

Базиліка мінор

В маріяньскім роцї, 22-го юна 1988-го року, Вселеньскый Архієрей Йоан Павел ІІ. апостольскым бреве установив лютиньску Церьков Успенія Пресвятой Богородіцї на базиліку мінор.

Лютина стала центром ґрекокатолицькых путників по тім, што ся в авґустї 1851-го року зъявив на недалекій горї над селом святый Николай бідній вдові Зузанї Фекете і пожадав єй, жебы там была збудована каплічка присвячена Успенію. Од 1855-го року зачали на місцї зъявліня робити ся реґуларны путованя віруючіх.

З будованём днешнёй базилікы мінор почало ся у 1896-ім роцї і храм докінченый быв у роцї 1903. Курто передтым пожар зничів попереднїй деревяный Храм святых Козмы і Даміяна. Днесь є базиліка мінор домінантным храмом, і од 2010-го року є звязана з базиліков Santa Maria Maggiore в Римі.

Петро МЕДВІДЬ, ЛЕМ.фм. Ґрафічна і языкова управа: АРК в СР.