21. 9. 2017: Треба створити Народну раду Русинів

Важены приятеля, Русины,

 

жебы сьме могли посунути діятельство Русинів на высшу уровень, то треба, подля мого погляду, сворити Народну раду Русинів (НРР), котра бы репрезентовала Русинів із векшым акцентом і предкладала нашы жаданя офіціалным штатным інтітуціям.

 

Жебы така решпектована і компететна репрезентація Русинів могла выникнути, то треба скликати цїлорусиньскый сейм, на котрім бы НРР дістала сильный мандат. На сейм бы требало позвати представителїв вшыткых єсвуючіх русиньскых орґанізацій і окремы особы, котры суть у прямім контактї зо жытелями нашой русиньской народности (священиків, учітелїв, старостів русиньскых сел і под.) і котры добрї знають проблемы Русинів у своїй найблизшій околіцї.

 

Доволю собі зато ословити дакотрых з вас, жебы сьме могли зачати діскутовати о можностях реалізації такого заміру. Пропоную зато стрїчу в Пряшові на ул. Главній у четверь, 5. октобра 2017, од 16.00 год. в салонику пиварнї і цукрарнї Вікторія (бывша Верховина), де бы сьме, окрем іншого, запропоновали мена далшых особ, котры бы ся знали з тым заміром стотожнити і знали быти напомічны при ёго реалізації.

 

Прошу підтвердьте свою участь. Тым, котрым термін не пасує, але стрїчу на тоту тему бы привітали, прошу о высловлїня ся або даня пропозіції на іншый (далшый) термін стрїчі.

 

Федор ВІЦО