21. 9. 2022: Утвердзени датуми отримованя „Костельниковей єшенї” и „Дньовки”
РУСКИ КЕРЕСТУР – На схадзки Орґанизацийного одбору Културней манифестациї „Костельникова єшень”, отриманей вовторок, 20. септембра у Доме култури Руски Керестур, утвердзени термини отримованая двох наши манифестацийох – „Костельникова єшень”, 29. по шоре, будзе отримана од 18. по 20. новембер, а ювилейна 25. „Дньовка” ше отрима 25. и 26. новембра.
Схадзку водзел предсидатель ОО Микола Шанта, а начално догварене же манифестация почнє на пияток, 18. новембра у Руским Керестуре на 17 годзин зоз виставу творох Силвестера Макая котри того року полнї 80 роки живота. На 18 годзин, тиж у просторийох Дома култури, отрима ше часц програмина котрей ше представя нови кнїжки. Будзе представена кнїжка приповедкох и есейох Михала Рамача „У нас у на салашу бул ґенерал”, кнїжка приповедкох Ксениї Варґа „Керестурски калеидоскоп” и роман Любици Кнежевич „Монах и я”.
Того истого дня у голу школи „Петро Кузмяк” буду представени кнїжки авторох Оксани Мудри Недич „Божа катичка”, Цецилиї Мудри „Гунцут” и Владимира Дудаша „Гибайце ше бавиц”.
Уж традицийне стретнуце рецитаторох „Михайло Зазуляк” у Кули, у рамикох „Костельниковей єшенї”, а у нєпоштредней орґанизациї и улоги домашнього домашнї РКУД „Др Гавриїл Костельник” будзе орґанизоване на соботу, 19. новембра на 18 годзин.
На нєдзелю, 20. новембра програма у рамикох манифестациї ше представи у Дюрдьове зоз уж спомнутима новима виданя и їх авторами.
На програми ювилейней 25. „Дньовки”, котра запланована за 25. новембер буду представени кнїжки Емилиї Чизмар „Мили МАК-у: Best off”и Зборнїк поезиї и фотоґрафийох „Ґенерация З@”, а шлїдуюцого дня, 26., новембра будзе главна програма „Дньовки” котру орґанизує Пакт Рутенорум.
Цала манифестация ше будзе означовац у знаку трох рочнїцох: 75-рочнїци од виходзеня часопису за дзеци „Заградка”, 50-рочнїци виходзеня МАК-у и 70-рочнїци Часопису за науку, литературу, културу и уметносц „Шветлосц”.
Ол. ЖИВКОВИЧ, Рутенпрес
(Публікуєме в оріґіналї – войводиньскім варіантї русиньского языка.)
