21. 9. 2023: В Ґреції проходила стрїча восточных католицькых єпіскопів

Як інформує Пресова аґентура Конференції єпіскопів Словакії (TK KBS), в понедільок 18-го септембра 2023-го року в містї Неа Макрі, в Ґреції, почала далша із реґуларных стрїч восточных католицькых єпіскопів Европы.

Стрїча орґанізуає ся під покровительством Рады европскых єпіскопскых конференцій. Домашнїм єпіскопом, котрый гостить европскых владыків, є апостолскый екзарха в Ґреції Мануіл Нін.

Словакію на стрїчі репрезентує архієпіскоп Кіріл Василь, кошіцькый єпарха, і владыка Мілан Лах, помічный єпіскоп Братїславской єпархії. Присутны суть і далшы єпіскопи традіції Ужгородьской унії, як наприклад владыка Ґеорґій Джуджар, єпархіалный єпіскоп Єпархії святого Николая в Руськім Керестурі, ці владыка Атаназ Орос, мішколцскый єпарха з Мадрярьска.

Стрїча почала приговорами владыкы Мануіла Ніна, апостольского екзарху про католиків візантійского обряду в Ґреції, і єпіскопа Яна Павсловского, апостольского нунція в Ґреції.

На одкрытю взяв участь і отець Мішел Ялах, маронітьскый священик, котрый є од фебруара новым секретарём Дікастерії про восточны церькви в Римі, як і єпіскоп Ґінтарас Ґурсас, архієпіскоп у Вілнюсїі председа Рады єпіскопскых конференцій Европы.

Владыка Мануіл Нін обернув увагу на факт, же тота стріїа проходить з нагоды сторочніцї приходу попередників з Константінополя до Афін в роках 1922 аж 1923 вєдно з єпіскопом Ґеорґём Калавасісом, котрый у 1932-і роцї став першым екзархом в Ґреції.

„Перевістно ґрецькый, наш екзархат, є днесь у віцї сто років екзархатом, досправдовов Церьквов, котра вже не є лем ґрецька, але за остатнїх пятьдесять років ся збогатила о два етнічны а передовшыткым церьковы факты, котры єй збогатили і далше збогаючують, і то о віруючіх халдейской традіції з Іраку і Сірії, а україньскых віруючіх візантійской традіції,“ повів владыка Мануіл.

„Будуть то днї молитвы, роздумованя, познаваня і дїлїня ся. Про нас вшыткых то будуть досправды сінодалны днї,“ продовжовав владыка з тым, же окремо будуть памятати на Католицьку церьков візантійской традіції на Україні, „і на цїлый україньскый народ в тім часї несправедливой войны.“

Стрїча восточных католицькых єпіскопів закінчіть ся в четверь 21-го септембра. Почас окремых засїдань мають єпіскопи принагоду діскутовати о тім, яку мають роль і місце восточны католицькы церькви в сучаснім світї, причім будуть брати до увагы різны вызвы, котры суть перед Католицьков церьквов, наприклад і в подобі войны на Українї.

Петро МЕДВІДЬ, ЛЕМ.фм, языкова і ґрафічна управа: АРК в СР.