22. 11. 2022: Пряшівскы крайскы посланцї склали святочну присягу

Присягу склав і староновый жупан Маєрьскый.

Председа Пряшівского самосправного краю (ПСК) Мілан Маєрьскый і 62 депутатів Заступительства ПСК склали 21-го новембра 2022-го року святочну присягу. Трьоми депутаты на присязі не были участны.

Подія проходилиа в історічній будові Театру Йонаша Заборьского в Пряшові, інформовала Леа Леготьска з Одділіня комунікації і пропаґації ПСК.

Функцію обгаїло по октобровых крайскых выборах цілково 39 депутатів, 26 є новых, причім шість депутатів ся до крайского парламенту знова вернуло, кедьже уж в нім сиділи в минулости. В порівнаню з попереднім функчным періодом має крайскый парламанет о трьох депутатів веце.

Векшыну мають незалежны

Меджі 65-ма посланцями, котры дістали мандат на найблизшы штири рокы, є лем вісем жен і 57 хлопів. В Заступительстві ПСК мають мандат і трёми посланцї Народной рады Словацькой републікы, успішна кандідатка, котра выконує і функцію державного секретаря, а 16 старостів і пріматорів.

Векшыну нового складу крайского парламенту творять незалежны кандідаты, котрых є 27. Другы найвекшы за кількостьов депутатів суть згодно дві коаліції. Першов є коаліція KDH, Sme rodina, SaS, Za ľudí, другов Hlas – sociálna demokracia, Smer – SD, Aliancia-Szövetség.

Выникли штири клубы, выбрали віцежупанів

Новый склад жупных посланцїв по святочній присязї брав участь і на першім офіціалнім засїданю заступительства.

В Заступительстві ПСК выникли штири клубы. Клуб жупана Маєрьского, в котрім суть партії KDH, SaS, Za ľudí, веде бывша пріматорка Пряшова Анреа Турчанова. Выникнув і Клуб Hlas і незалежны. Далше будуть в заступительстві дїяти два клубы незалежных посланцїв. Першым є Клуб незалежных депутатів, котрый веде Штефан Біеляк, другым Клуб Вєдно за реґіон на челї котрого буде стояти Ян Гірчко. Затля не склав присягу, клуб дочасно веде підпредседа Йозеф Кмець.

На посаду віцежупанів, підпредседів краю, посланцї выбрали гласованём Штефана Біеляка (Клуб незалежных посланцїв) і Йозефа Канущака (Клуб KDH, SaS, Za ľudí).

Третїй віцежупан затля не быв выбратый. Партія Hlas – sociálna demokracia хотіла номіновати Михала Калиняка, котрый быв протикандідатом Маєрьского на посаду жупана, но Маєрьскый ёго номінацію не акцептовав. Посланцї схвалили і зряджіня фінанчной комісії, котрой председкынёв буде Зузана Беднарова.

Найблизше засїданя Заступительства ПСК одбуде ся 12-го децембра, і главнов темов буде розрахунок на 2023-ій рік.

Петро МЕДВІДЬ, ЛЕМ.фм. Ґрафічна і языкова коректура: АРК в СР.