22. 4. 2022: Кому вадят двоязычны назвы сел на Лемковині?

Хоц на хвилю была надія, што до декотрых річы даякы громадяне уж «дозріли».

Через пару років был спокій, аж дотепер. В Білянці при Ґорлицях незідентифікуваны дотля справці замалювали (дальшый уж раз) двоязычну польско-лемківску таблицю з назвом села.

На тот момент тяжко повісти, коли мал місце хуліґаньскій злочын, але правдоподібно вночы з остатньой неділі на понедільок, значыт в ніч з Великодня на Світлый понеділок за тзв. новым стильом (17. / 18. квітня/апріля). 

Заміщена знимка вказує таблицю з назвом села од страны Шымбарку. Таблиця была замазана правдоподібно шпрейом з обох стран. Справці замалювали лем лемківскоязычну назву «Білянка», а польска част «Bielanka» є нерушена. Нашы інформаторы донесли, што щестливо таблиці з інчых стран Білянкы сут впроядку, значыт од Лоси, і од Ліщын таблиці не были знищены. 

Стоваришыня «Руска Бурса» в Ґорлицях зголосило одповіднім орґанам прикрый інцидент, з надійом, што справом займут ся не лем самоурядовы інституциі, але предовшыткым орґаны, якы мают за задачу найти, обвинити і покарати справців. Самом таблицьом має заняти ся Повітовый Заряд Доріг.

Здає ся, што як раз Білянка то місцевіст, в котрій дотля найчастійше нищыли двоязычны таблиці. Припомнийме, што было то перше село на Лемковині, якє з ініциятивы Стоваришыня Лемківской Молодежы «Чуга» в Польщы отримало двоязычну польско-лемківску таблицю з назвом місцевости. Одкрытя было 24. листопада/новембра 2008 р.

Сама Білянка то місце, де долгы рокы діял основаный в 1969 р. Маестром Ярославом Трохановскым Репрезентацийный Ансамбль Лемків в Польщы «Лемковина». Гын вродил ся, діял і похованый єст выдатный лемківскій соспільно-політычный діяч і поета Павел Стефановскій (1932-2021).

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)