22. 6. 2022: Коло Яна, коло Яна там дівчата ся сходили

Віночкы, музика, танец і дуже доброй забавы – так мож підсумувати єдну з найцікавшых культурных подій в ґорлицкым повіті. Бесіда о Малопольскых Вінках орґанізуваных в Скансені Погіряньского Села в Шымбарку.

В минулу неділю, 19. червця/юнія, одбыли ся Малопольскы Вінкы 2022. То уж V едиция стрічы, яка посвячена єст традициі собіток. Подію заініциювал Молодіжный Фольклорый Ансамбль «Рутич» діючый при Ґмінным Осередку Культуры в Ґорлицях.

Як што рока подія прошла в урокливым Скансені Погіряньского Села в Шымбарку. Серед старых хыж і будинків орґанізаторы заплянували варштаты робліня вінків і артистичного ремесла, а для наймолодшых додатковом атракцийом был плястичный конкурс з нагородами. Нагоду запрезентувати ся мали тіж Кружкы Сельскых Ґаздынь з ґміны Ґорлиці, котры зрыхтували для участників Собіткы почастунок.

Участ в подіі взяли не лем члены Рутича, але тіж члены ансамблів Поляне і Бескіды, котры запрезентували ся з танцями і піснями. Не бракло тіж лемківскых акцентів, бо серед артистичных ґруп нашли ся представникы ансамблю Терочка, діючого при Стоваришыню «Руска Бурса» в Ґорлицях. Терочковы дівчата разом з ведучым ансамблю вели варштаты гуляня, на котрых вчыли охочых свого жіночого танця.

Цікавым розвязаньом для інтеґруваня участників были співникы зрыхтуваны через орґанізаторів. Кажда пісня співана ансамблями находила ся в співнику і зобраны могли не лем слухати і захоплювати ся, але і  брати активну участ в традицийных обрядах.

Друга част подіі зачала ся од єдной з найбарже знаных традиций звязаных з Ночом Купалы – од гляданя квітя папортины. Пак участникы разом з ансамблями короводом перешли до ватры, котра находила ся ниже Скансену, коло рікы Ропа. Там, за традицийом, зілярка бесідувала про зіля і його значыня, а пак шмарила го в оген, што мало принести здоровля ци охорону для участників подіі. То тіж найліпшый час для молодых хлопців, котры хотят ся запрезентувати перед дівчатами – зато пописували ся при скаканю над огниском.

Найважнійшым пунктом подіі было пущаня паннами вінків на воді. Молоды дівчата входили до рікы і пущали до воды кольоровы вінкы, котры пару годин скорше робили на варштатах. Хлопчыска стояли ниже рікы і чекали аж першы вінкы вкажут ся на воді. Товды зачали ся змаганя, хто зімат більше. По тым як вытягли вшыткы вінкы,  забрали ся за метаня до воды дівчат, а на конец і самого війта ґміны Ґорлиці.

 

Ольга ПЕЛЕХАЧ, ЛЕМ.фм., фот. Bogdan Malesza

(Публікуєме в оріґіналї – лемківскім варіантї русиньского языка.)