22. 7. 2022: Амбіції на пензії

Выбратя Павла Боґдана за председу є доказ выпорожнїня.

На зачатку юла словацькый медіалный простор інформовав о тім, же Союз „Русинів-Українців“ Словацькой републікы на своїм зъїздї выбрав за нового председу Павла Боґдана. В пресовій справі „новый“ председа такой заатаковав Русинів.

„Самособов, мы далше тырваме на тім, же ту не іде о дві народностны меншыны на северовыходї Словакії. Є ту єдна народностна меншына, і є єдно, як єй будеме называти, ці Русины, Українці або Русины-Українці,“ цітовала пресаґентура TASR Боґдана.

Наперед ку „новому“ председови. „Новый“ председа вів союз вже од 2018-го року як ёго підпредседа, кедь неочековано абдіковав з позіції Петро Сокол. Од 2018-го року славный союз, котрый в минулости часто комуніковав, же має дакількотісячову членьску базу, не знам ці не аж векшу, як ся Українцїв на Словакії реално голосило, не быв способный выбрати нового председу.

Так само „новый“ председа не є жадна молода кров. При вшыткій почливости ку віку і старшым людям, выбрати за председу чоловіка, котрый має вже по сімдесятцї, скоріше свідчіть о тім, же славный союз властно жадну молоду, актівну і способну ґенерацію людей, котры бы могли орґанізацію вести до далшых років, не має. А то мали на выбратя штири рокы. Якбач не нашли.

Но і што „новый“ председа може принести тій орґанізації „Русинів-Українців“ як візію? Ніч.

Властно лем повторяня тем, котры повторяють вже веце як тридцять років, атакы на Русинів, хоць цїла їх політіка по 1989-ім році не вела до ничого іншого, лем до того, же днесь ку Українцями голосить ся шістьраз менше людей як ку Русинам і Русины перекрочіли єдно проценто, і творять 1,2 процента популації на Словакії, покля їх українізачна політіка тримать ся процентуално при нулї.

Але нїт. Не мож быти такым песімістом в припаді Павла Боґдана. І кедь є то чоловік, котрый має пензійный вік, іщі все знать прийти і не сподївати з чімсь новым.

Павел Боґдан ся вдяка сітуації на Українї може чути быти на коню, але він з того коня, вєдно з ёго орґанізаціёв, вже давно впав.

Ґазета Нове життя, котру союз выдавать, принесла у своїм 14-ім чіслї цїлый текст оцїнкы дїятельства союзу од 2017-го року, котру приготовив і прочітав „новый“ председа. І в тій оцїнцї в рамках планів до будучности треба ясно повісти, же Павел Боґдан приходить з новотов.

Окрем того, же знова споминать, же треба возродити україньску школу (про кого?), або же треба треба обновити народностный характер Ґрекокатолицькой і Православной церькви (якой народности?), є в планах Павла Боґдана принавернути „україньскый характер Театру Александра Духновіча і його ансамблю,“ розумій Піддукляньсому умелецькому людовому субору (ПУЛС), котрый од свого выникнутя аж до 2008-го року быв балетом і оперетов театру.

А в тім є досправды новота. Покля дотеперь бісїдовали сьме лем о продовжуючій українізації, започатій іщі комуністами і дотеперь реалізованій „Русинами-Українцями“, одтеперь треба до словника впровадити і термін реукраїнізація.

Бо хотїти вернути „україньскый характер“ інштітуціям, котры як першы по 1989-ім роцї прияли русиньску орьєнтацію і стали першыма русиньскыма професіоналныма умелецькыма інштітуціями, є досправды намага о реукраїнізацію.

Оно бы то было на плач, кебы то не было на сміх. Павел Боґдан ся вдяка сітуації на Українї може чути быти на коню, але він з того коня, вєдно з ёго орґанізаціёв, вже давно впав. Сітуація на Українї, хоць і Русины ясно высловили солідарность, ніч не мінить на тім, же третє возроджіня Русинів по 1989-ім роцї было правилнов путёв, на котру Русины мали своє право, і котра, а то є главне, має свої плоды.

Українцї ся в переписах по 1989-ім роцї лем страчали, а теперь бы тыж не підросло чісло Українцїв, кебы ту уж не быв факт робочой міґрації.

То є „реклама“ про роботу Союзу „Русинів-Українців“, і „нового“ председы. Зато є смішне, кедь днесь Павел Боґдан хоче рядити 63 і пів тісяч Русинів, розказовати їм, хто суть, і їх інштітуції робити україньскыма. Покля іщі не відїв громадну волну неволї, пак то може спробовати.

Павел Боґдан, єднако як цїлый союз, вже ніч нове принести не може, ани не принесе. Надумують собі, як мають міцну позіцію, але реално выбратя Павла Боґдана за „нового“ председу по штирёх роках гляданя, є доказом выпорожніня орґанізації, єднако як є выпорожнена і цїла їх думка українізації, котра у людей не мать підпору.

Павел Боґдан у своїй оцїнцї окрем іншого чітав, же покля штось не зроблять, будуть остатнёв ґенераціёв той „народности“. Но, покля іде о Русинів, бізовно ніт, але вірю і тримам палцї, жебы были остатнёв ґенераційов „Русинів-Українців“ і цїлого їх союзу. Велё можностей про них уж не є, кедьже амбіції там мають якбач лем тоты на пензії.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Статя была написана як коментарь „Вступне до контроли“ лемківского радія lem.fm. Фото: Pixabay.com.