22. 9. 2018: Міністер Клімкін узнав Русинів

Хоць Київ офіціално не узнавать Русинів на Україні як окремый народ, і русиньска меншына є узнана лем Закарпатьсков областнов радов од 2007-го року, міністер загранічных дїл Україны говорить о тім, же в Закарпатьскій области Україны жыють Русины.

Павло Клімкін, котрый веде україньскый резорт діпломації, говорив о Русинах в проґрамі Сніданок з 1+1, інформує портал ТСН.

„Закарпатя не мож порівнёвати з Донбасом. Закарпатя складне: там суть Мадяре, Румуны, Русины,“ повів Клімкін, котрый єдночасно підкреслив, же каждый зо спомянутых народів выжадує окремый приступ. Без такой політікы і окремого приступу ку каждій меншын подля головы україньской діпломації нич не буде. На ёго думку Українцї мають тым меншынам зрозуміти і помочі їм.

Клімкін так само звернув увагу, же не Мадярьско має помагати Закарпатьскій области, але Україна. „В крайнім припадї мы вєдно із Мадярями, а не Мадяре самы, як то є днесь,“ думать україньскый міністер, котрый є пересвідченый, же Україна не має делеґовати старостливость о своїх жытелїв мадярьского походжіня на іншу державу. Мадярьско уж довшый час многыма формами помагать жытелям Закарпатьской области Україны, ці фінанчно або і можностёв здобыти мадярьске обчанство, а такым способом і мадярьскый паспорт, значіть паспорт державы Шенґеньского простору.

Перед часом зрядили в Мадярьску функцію міністерьского уповномоченого про економічный розвиток Закарпатьской области і про розвиток мадярьскых школ у карпатьскім облуцї.

Петро МЕДВІДЬ, жрідло: лем.фм, жрідло фотоґрафії: www.tochkazoru.pp.ua