23. 1. 2024: На стрїчі словацькой презіденткы з обчаньсков сполочностёв участный і председа ОСРС

Кріпку обчаньску сполочность із фунґуючіма мімовладныма орґанізаціями потребує кажда демокрація, включно той словацькой.

Презідентка Словацькой републікы Зузана Чапутова то повіла у віторок, 23-го януара 2024-го року, в рамках свого приговору почас традічного новорочного приятя представителїв обчаньской сполочности. Участь на стрїчі з презідентков брали представителї понад 50-ёх мімовладных орґанізацій з різных областей сполоченьского жывота.

Запрошеный на стрїчу, котра проходила в Презідентьскім палаці, быв і председа Округлого стола Русинів Словакії Петро Штефаняк (на фотцї).

„Презідентка тым способом хотїла оцїнити роботу орґанізацій і ближе спознати перспектівы окремых здружінь,“ повів председа ОСРС, котрый з нёв мав і куртый особный розговор. Особно презідентцї передав поздоровлїня од Русинів, і подяковав главі державы за людьскый приступ і інтерес о дїяня народностных меншын.

Штефаняк окремо підкреслив актівности прямены до Русинів почас Дня Русинів Словакії, котры резоновали в сполочности з барз позітівныма реакціями.

Припоминаме, же в роцї 2023 на День Русинів Словакії, котрый святкує ся 12-го юна, презідентка Чапутова навщівила русиньску комуніту в Братїславі. Завітала до просторів, в котрых має свої нацвікы Фолклорный ансамбель Рутенія, як і Дїтячій фолклорный колектів Рутенячік. І в далшых попереднїх роках все спомянула собі на Русинів почас їх цїлодержавного свята.

Словацька презідентка почас стрїчі з обчаньсков сполочностёв, значіть мімовладныма орґанізаціями, меджі котры належать і русиньскы орґанізації, повіла, же обчаньска сполочность часто доповнює роль державы, припадно рїшыть абсенцію державных рїшінь. Мерзить єй, кілько енерґії мусять мімовладны орґанізації присвятити обранї перед політічно мотівованыма атаками.

Петро МЕДВІДЬ, ЛЕМ.фм, языкова і ґрафічна управа: АРК в СР.