23. 2. 2024: UNESCO: Освіта в материньскім языку підтримує учіня

21-го фебруара святкуєме Меджінародный день материньского языка, котрый выголосила 30-та ґенерална конференція Орґанізації зъєдиненых народів про освіту, науку і културу (UNESCO) в новембрї 1999-го року, і од року 2000 собі го реґуларно припоминать цїлый світ.

Історія выникнутя того дня сягать до 1952-го року, коли уряды в области днешнёго Банґладеша намагали ся одсторонити бенґалскый язык, якый быв меншыновым языком в области, і вычеряти го за урдьскый язык.

Почас протестів на універзіті в містї Дака, днесь столиця Банґладешской народной републікы, передтым Пакістан, застрїлила поліція 21-го фебруара 1952-го року штирёх штудентів. З цїлём заховати память на них быв выголошеный Меджінародный день материньского языка.

Вална громада Орґанізації зъєдиненых народів вызвала членьскы державы, „жебы підтримовали захованя і охрану вшыткых языків хоснованых народами світа“. Подля одборників у сучасности бісїдує ся понад 7100 языками, но приблизно 40 процент з них є огроженых.

„Языкова розмаїтость є штораз веце огрожена, кедьже все веце языків заникать,“ варує на своїй вебсторінцї UNESCO, і вказує на факт, же „цїлосвітово 40 процент популації не має приступ ку освітї в языку, котрым бісїдує або котрому розуміє“.

Вшыткы крокы на підпору шырїня материньского языка помагають нелем розвивати языкову розмаїтость і вецеязычну освіту, але і розвивати усвідомлїня о языковых і културных традіціях на цїлім світї, а єдночасно дїють іншпіратівно в повязаню із солідарностёв, яка є основана на порозумлїню, толеранції і діалоґу, пише ся ку Меджінародному дню материньского языка.

Вецеязычна освіта є стовпом меджіґенерачного учіня – то є тема тогорічных святковань Меджінародного дня материньского языка. „Освіта в материньскім языку підтримує учіня, ґрамотность і освоїня собі далшых языків,“ припоминать в повязаню із святом UNESCO.

 

Петро МЕДВІДЬ, ЛЕМ.фм, языкова і ґрафічна управа: АРК в СР.

Фото: ОЗ Колысочка.