23. 3. 2019: Одбыла ся членьска громада Руського клубу-1923

У вівторок, 19. марца 2019, ся в просторах Музея русиньской културы на Масаріковій уліцї в Пряшові одбыла членьска громада Обчаньского здружіня Руськый клуб-1923. Членьску громаду вела председкыня Руського клубу-1923, Мґр. Анна Ґалёва.

Главнов частёв проґраму было інформованя членів о актуалнім ставі судных їднань односно будовы Руського дому. Анна Ґалёва інформовала, же будова є в злім технічнім ставі, північны просторы суть перемочены, пронаїмають ся лем дві канцеларії а будова є цїлково в запущенім ставі, причім ся не може приступати к реконштрукчным роботам, бо будова є предметом судного їднаня. Зато, як было повіджене, є треба што найскорше вырїшыти властніцькы права, жебы ся передышло демолації дакотрых частей будовы, ід котрій є велика правдоподобность, же може в будучности прийти. Ґалёва інформовала, же была на суд подана скарга на становлїня властніцького права на будову а чекать ся на поїднаваня.

О далшых кроках буде Ґалёва інформовати на слїдуючій членьскій громадї.

Мґр. Зденка ЦІТРЯКОВА, ІРЯК ПУ