23. 3. 2022: В Тополї выникать ремеселный центер

Як інформовала аґентура ТASR, в селї Тополя, Сниньского окресу, де народив ся будитель Александер Духновіч, выникать копія традічной деревяной хыжы з перелому 19-го і 20-го столїтя. Має служыти як ремеселный центер.

Вшытко то ініціатіва обчаньского здружіня Кошарь, котре ся пустило до реалізації того заміру вдяка реґіоналній дотації з проґраму підпоры найменше розвитых окресів Міністерства інвестіцій, реґіоналного розвитку і інформатіації

Словацькой републікы.

„Традічна култура нашых предків сохранила ся співами і танцями, но автентічна архітектура цалком счезла, а вєдно з нёв і ремесла з тым повязаны. Стары майстры вымерли, молоды ся не учіли,“ повів про аґентуру Ярослав Лехан з обчаньского здружіня, жебы поснити, чом ся хыжа будує.

Поедля ёго слов ремесла заслужать собі почливость, деревяна хыжа буде служыти як ремеселный центер. Люде ся там будуть годны познакомити з ремеслами і самы выпробовати гончарьство, роботу із соломов на стрїху, кошыкарьство ці выробу деревяных шындлїв.

Хыжу зачали будовати минувшый рік і дістали на ню дотацію 61 тісяч евр. Робота теслярїв ся робила традічно, без гвоздиків. В найблизшім часї має зробити ся шындлёва стрїха і ваковка. „Деревяна хыжа буде комплетно в глинянім кожуху,“ доповнив Лехан з тым, же в лїтї уж бы мала будова служыти планованому заміру.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Фото: FB/Ярослав Лехан.