23. 4. 2024: В Мукачові припомянули собі 30 років од обновлїня Общества Духновіча

20-го апріля 2024-го року в просторах Мукачовской містьской централной бібліотекы імени Александра Духновіча одбыла ся святочна подїя, котров припомянула собі русиньска громада Підкарпатя 30 років од обновлїня Общества імени Александра Духновіча.

На події выступили Юрій Продан – председа Закарпатьского областного научно-културолоґічного общества імени Александра Духновіча, Юрій Шипович – редседа Русиньского културолоґічного клубу, Євген Жупан – председа Народной рады Русинів Закарпатя і далшы.

Участници так само положыли вінець ку басрельєфу Духновіча, котрый находить ся на фасаді бібліотекы, яка несе ёго імя.

Русское культурно-просвѢтительное общество имени Александра Духновича было основане 23-го марца 1923-го року в Мукачові на зборах 163-ёх културных актівістів Підкарпатьской Руси, і было якбач найвызначнїшов русиньсков културно-общественнов і освітнёв орґанізаціёв Русинів того періоду нелем на Підкарпатьскій, але і на Пряшівскій Руси.

Дефінітівно свою роботу закінчіло у 1944-ім роцї приходом Червеной армады на Підкарпатя, хоць фунґованя общества властно перервало ся з політічных причін уж на кінцю 1938-го року.

4-го апріля 1991-го року была в селі Поляна, Свалявского району, одкрыта буста Духновіча, в рамках чого выступав і Михаіл Алмашій, котрый оголосив потребу обновлїня общества. Через два рокы, 24-го апріля 1993-го року, в Ужгородї одбыла ся установлююча громада Ужгородьского містьского общества імени Александра Духновіча. За першу голову быв выбраный Василь Русин.

19-го авґуста 1993-го року одбыло ся в Мукачові засїданя ініціатівной ґрупы в дїлї возроджіня общества, де вырїшыли зробити 18-го септембра того самого року в Домі Русинів установлююча громада Містьско-районного общества імени Александра Духновіча. На установлюючіх зборах быв за голову выбратый Михаіл Алмашій.

12-го апріля 1994-го року, од чого минуло точно 30 років, зорґанізовала ся установлююча конференція Областного общества імени Александра Духновіча, котрого председом став так само Михаіл Алмашій. Днешнє Закарпатьске областне научно-културолоґічне общество імени Александра Духновіча є так прямым наслїдником меджівойнового общества.

Припоминаме, же паралелно з тым было обновлене Общество Духновіча і в Пряшові. На тім мав заслугу далшый вызначный русиньскый актівіста по 1989-ім році, Гавриїл Бескид. Робота общества в Пряшові почала стаґновати вєдно з тым, як зачав мати здравотны проблемы Гавриїл Бескид, котрый у 2022-ім роцї вмер.

Петро МЕДВІДЬ, ЛЕМ.фм, языкова і ґрафічна управа: АРК в СР. Фото: Мукачовска містьска централна бібліотека імени Александра Духновіча.