23. 5. 2023: Свідник уж має про турістів і в проводників. Вкажуть і околіцю

Цертіфікованы службы проводників запровадив в тых днях Турістічный інформачный центер Свідник. Як аґентуру TASR інформовала говоркыня міста Крістіна Тхірова, такы службы дотеперь в реґіонї не были.

Турістічный інформачный центер Свідник уж нову службу і спробовав, кедже місто на початку турістічной сезоны навщівила 48-членна ґрупа турістів.

„Навщівници мали інтерес о переглядку Дукляньского перевалу і далшых воєньскых памяток, деревяного храму в Ладомировій, записаного в світовім списку дїдовизны UNESCO, і хотїли веце дізнати ся о нашім містї – історії, інтересностях, а о дїлах зо жывота,“ повіла Мартіна Лазенґова, котра є цертіфікованым проводником Турістічного інформачного центра Свідник.

За їй словами турісты у Свіднику і в околіцї мають даяку обявлёвати унікатну дїдовизну і історію. Воєньска історія вєдно з Карпатьсков деревянов стежков, котра є характерістічна про реґіон, стає штораз веце выгляданов локалітов і атракціёв нелем про навщівників із Словакії, але і зо заграніча.

Турістічный інформачный центер Свідник уж од початку реґістровав інтерес о службы проводників, но так само собі усвідомлёвали проблему з тым, же хыбують цертіфікованы особы в реґонї.

„На выконованя такой роботы треба здобыти цертіфікат о абсолвованю акредітованого навчалного проґраму у фаху, выданый освітнёв інштітуціёв акредітованов Міністерством школства, наукы, баданя і шпорту Словацькой републікы,“ доповнила Лазенґова.

Інформації о новых службах про турістів мож найти на вебсайтї міста Свідник, но мож ся о них дізнати і на соціалных сітях міста, телефонічно ці прямо в інфоцентрї.

Петро МЕДВІДЬ, ЛЕМ.фм, языкова і ґрафічна управа: АРК в СР.