23. 6. 2022: В Гуменнім святочно одкрыли зреконштруованый каштель

В просторах каштелю є Вігорлатьскый музей.

В Гуменнім у віторок, 21-го юна 2022-го року, святочно одкрыли обновленый каштель. Як інформовала Леа Геілова із Оддїлїня комунікації і пропаґації Пряшівского самосправного краю (ПСК), по фіналізації ІІ. і ІІІ. етапы завершыла ся ёго комплетна реконштрукція.

За 2,37 міліона евр обновила жупа ренесанчный каштель, в котрім має свої просторы Вігорлатьскый музей, з тым, же ся обновила внутрїшня фасада і зреконштруовав двір.

Обновлена історічна домінанта

„Я барз радый, же ся нам подарило докінчіти комплексну реконштрукцію Вігорлатьского музея в Гуменнім, котрый належыть ку найвекшым културным атракціям на Земплінї. На тоту обнову сьме врамках ІІ. і ІІІ. етапы, котры безпосередно надвязовали на себе, а часточно проходили і в єднакім часї, дали із властных джерел немалы фінанчны средства, конкретно 1,73 міліона евр. Далшых понад 643-тісяч дало Міністертво културы з проґраму Обнов собі свій дім, решту дофінанцовав музей,“ пояснив председа ПСК Мілан Маєрьскый.

За ёго словами то точка за великов інвестічнов акціё в, котров реґіон і цїлый край здобыв домінантну історічну памятку, котра буде служыти людём на културны події і навщівникам музея.

В рамках ІІ. і ІІІ. етапы реконштрукції зробило ся дуже много роботы. Зреконштруовали ся фасады на дворї ренесачного каштеля, балкон, комплетно вымінили ся аркады, облакы, ренововали ся історічны дверї. Так само на дворї зробила ся травертінова підлога, быв там бетон, зреконштруовала ся студня, але робила ся і каналізація, водовод ці електрика а много далшого.

Вернули автентічну подобу

„Реконштруцкіёв подарило ся вернути каштелю автентічну подобу, котра корешпондує з послїднёв перебудовов Андрашіёвых із кінця 19-го столїтя. Ёго обнова і з приправами тримала майже 15 років. Быв то барз складный процес, котрого резултат, віриме, є імпозантна переміна і главно сохранїня той вызначной народной културной памяткы,“ повів Василь Федіч, директор Вігорлатьского музея в Гуменнім.

ІІ. і ІІІ. етапа реконштрукції надвязала на І. етапу, котра была закінчена іщі у 2016-ім роцї і ПСК втогды на ню дав 2,6 міліона евр. Обнову фінанцовав з пожычкы Европской інвестічной банкы. Велику реконштрукцію опередили од 2008-го року баданя, засягы до статікы будовы, модернізація технічной інфраштруктуры і великы інтерьєровы роботы.

Цїлкова інвестіція до комплетной реконштрукції каштеля так досягла суму 6,5 міліона евр.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.