23. 6. 2022: Русины вже офіціално третя найвекша меншына на Словакії

Резултаты із Списованя жытелїв, домів і квартелїв 2021, котры дотуляють ся народности і далшой народности, будуть інтерпретовати ся як зрахованя двох рівноцїнных народностных катеґорій.

Пропозіцію такой інтепретації, яку перед тым підпорили членове Выбору про народностны меншыны і етнічны ґрупы Рады влады Словацькой републікы про людьскы права, народностны меншыны і родову ріновсть, як і членове самой Рады, 22-го юна 2022-го року схвалила влада Словацькой републікы. Інформовала о тім аґентура ТASR.

Подля схваленого моделу ку мадярьскій народности приголосило ся довєдна 456 148 жытелїв Словацькой републікы. В процентах мадярьска меншына представлює 8,4 процента із популації на Словакії. За данов інтерпретаціёов ку ромскій народности приголосило ся 2,9 процента населїня, в абослутных чіслах 156 164 особ.

Так як в попереднїм періодї, і теперь по мадярьскій і ромскій меншынї зістане третёв найвекшов русиньска меншына. Подля резултатів списованя рахують офіціално Русины на Словакії 63 562 особ, што представлює 1,2 процента з популації. Четвертов найвекшов народностнов меншынов є чеська, ку якій ся приголосило 45 711 особ. Чехы творять 0,8 процент населїня.

Схвалена інтерпретація є основнов ку розшырїню списку сел і міст, в котрых членове народностных меншын будуть мати право хосновати меншыновый язык урядно. Новых меншыновых сел буде нецїлых 160, з того веце як половина – 88 сел, буде русиньскых, і цїлково Русины будуть мати од 1-го януара 2023-го року 154 сел.

Уповномоченый влады Словацькой републікы про народностны меншыны Ласло Буковскый звернув увагу на стратеґічне значіня позбераных даных в списованю.

„Маєме ку діспозіції даны, котры сьме очековали, о котры ся можуть окремы меншыны, держава, але і самосправы оперти.  Я радый, же нашы намагы не были марны, і днесь можеме продовжовати в посилнїню меншыновых прав,“ написав Буковскый.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.