23. 7. 2021: Буковскый укрїплять сполупрацу з Радов Европы

Уповномоченый влады Словацькой републікы про народностны меншыны Ласло Буковскый прияв у середу, 21-го юла 2021-го року, Оксану Томову, надзвычайного і уповномоченого посла Словацькой републікы і постійного представителя Словацькой републікы при Радї Европы.

Буковскый є пересвідченый, же стрїча принесе новы імпулзы в области охраны меншыновых прав.

Словацька републікы поступным приятём Рамкового договору на охрану народностных меншын і Европской харты реґіоналных або меншыновых языків обовязала ся хранити права народностных меншын і на меджінародній уровни.

„Приятя споминаных документів не быв лем формалный акт, але правны рамкы, котры суть фундаментом меншыновых прав на Словакії, якы ся реґуларно моніторують,“ інформує сайт уповномоченого.

І з той причіны была стрїча з Томовов заміряна на зінтензівнїня і проглублїня сполупраці при просаджованю меншыновых прав. Партнеры доїднали ся, же як першы приготовлять меншыновы языковы мутації приручників о хартї меншыновых языків, котры пак публікують на вебсайтї Рады Европы і уповномоченого.

Уповномоченый про народностны меншыны так само одкрыв тему зряджіня фонду, з котрого бы меншыновы орґанізації і самосправы могли фінанцовати аплікацію языковых прав.

Оксана Томова є професіонална словацька діпломатка. Штудовала в Петербурзї і походить з Меджілаборець. Декрет на функцію надзвычайного і уповномоченого посла Словацькой републікы і постійного представителя Словацькой републікы при Раді Европы собі перевзяла з рук презіденткы Зузаны Чапутовой в апрілю того року.

Петро МЕДВІДЬ, ЛЕМ.фм, ґрафічна і языкова управа: АРК в СР.