23. 8. 2022 В Лютинї одбыв ся архієпархіалный одпуст

Як інформовав говорця Пряшівской ґрекокатолицькой архієпархії Михал Павлишіновіч, почас вікенду, в днях 20-го і 21-го авґуста 2022-го року, одбыв ся в найвекшім путницькім місці ґрекокатоликів на Словакії – в Лютинї, архієпархіалный одпуст ку празднику Успенія Пресвятой Богородіцї.

Богатый духовный проґрам быв про віруючіх традічно приготовленый на двох місцях – в базиліцї мінор прямо в селї, як і на Маріяньскій горї над Лютинов, де перед 171 роками зъявив ся святый Николай бідній вдові Зузанї Фекете.

Торжественну архієрейску літурґію в недїлю дополудне на Маріяньскій горї одправляв архієпіскоп Кіріл Василь, кошіцькый єпархіалный єпіскоп, котрый і проповідав.

Вєдно з ним служыли апостольскый адміністратор Пряшівской архієпархії і братїславскый єпарха владыка Петро Руснак, емерітный пряшівскый архієпіскоп і метрополіта владыка Йоан Бабяк, і емерітный торонтьскый єпарха владыка Маріян Андрій Пацак, як і дакілько десяток священиків.

На одпустї в Лютинї брав участь і премєр Словацькой републікы Едуард Геґер, веце посланцїв Народной рады Словацькой републікы, председа Пряшівского самосправного краю Мілан Маєрьскый зо женов Міріам Лексманн, котра є посланкынёв Европского парламенту, як і далшы представителї містных самосправ з околіцї.

Співом главну літурґію в недїлю допроводив Хор святого Романа Сладкопівця і молодежный Хор святых Петра і Павла з Мільпоша. Богослужіня зо суботы і недїлї высылали ся і в цїлословацькых медіах.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.