23. 9. 2023: У плоднім дїятельстві писатель Штефан Смолей дожыв ся 90-роча

Штефан Смолей народив ся 13. 9. 1933 у Рошківцях, теперь жыє і творить у Меджілабірцях. Є автором высше трёх десяток книг поезії і прозы в русиньскім языку. Є тыж лавреатом Премії Александра Духновіча за русиньску літературу, кокретно став ся ним у 2014 роцї за книжку Бурї над Бескидами.

Русиньскый писатель Штефан Смолей ся у своїй довгорочній літературній творчости, подобно як є то звыком ай у іншых авторів, не занимав лем із єдным літературнyм жанром ці поступом. Смолей є найзнамішый як прозаїк, але немало выдав зборників поезії ці баёк. В ёго прозаічных текстах суть главныма особами обычайны сільскы люде, котрых жывот є повный радости, але і старостей. Автор указує незломность і силу людьской волї, котра і наперек проблемам і жывотным пробам ся не огне, але вытримать. В тым припадї автор тыж підкреслив вартость силных родинных односин. Найновше в друкарнї є ёго публікація Невинны покараны, а мы віриме, же потїшыть нёв неєдного русиньского чітателя.

В ёго прозаічній творчости суть наприклад описаны спросины і наслїдна свадьба.Ту не іде о етноґрафічно, детаілно документованый текст, скорїше іде о белетрізованый опис традіцій і звыків, котры автор у молодости зажыв і на котры споминать.

Вдякам Смолеёвому приступу к різным темам можеме повісти, же ёго тексты можуть быти вгодны про школьску практіку, нелем на годинах русиньского языка, але наприклад і на декламацію русиньской поезії і прозы, а інсценізованя сценок русиньскых традіцій і звыків.

На многая лїта!

М. П. (Скорочене.)