24. 1. 2022: «Місто нескінчене». Підпорме выданя каталоґу выставы Мирослава Трохановского

«Кєд люблят ся вам моі образы і хочете помочы мі в тым, што роблю, буде то для ня великє спертя, не лем фінансове, але тіж емоцийне...»

Мирослав Трохановскій серед нашой громады є радше більше знаный як іконописец – творця ікон, іконостасів і церковных розписів. Але його артистична робота зосереджат ся тіж на світскым малюнку, якій оддзеркалят не лем типово лемківскы мотивы. Зато уж неодолга будеме мочы видіти выставу як раз той части образів, яка не односит ся стисло

до лемківской тематикы.

З той причыны мал бы быти выданый і принагідный каталоґ. Лем жебы могли сме го тримати в руках, потрібне є фінансове спертя. Мирослав Трохановскій оголосил інтернетову колекту, до котрой заохочаме долучыти.

«Місто нескінчене»

Як інформує Мирослав Трохановскій, того рока має быти зорґанізувана в ґорлицкій Ґалериі Двір Карвациянів выстава його образів. То цикль під назвом «Місто нескінчене», якій тематично вяже образы названы як «Поліс».

На жаль, Ґалерия не єст в силі найти фінансів на выданя принагідного каталоґу, котрый мал бы промувати выставу. Зато, жебы найти охочых сперти артистичный кумшт, на сайті www.zrzutka.pl Мирослав Трохановскій зорґанізувал колекту на тоту ціль. «Сума не здає ся быти вынятково высока, але в тій хвили про мене є не до осягніня. Хочу дотерти з моім малярством до як найшыршой ґрупы люди, так жебы могло оно тішыти очы, духово і емоцийно збогачати та будити приємны естетичны дознаня. Преця медже інчыма з той причыны творит ся штуку», пише в описі колекті маляр Мирко Трохановскій.

Дальше чытаме, што каждому, хто не зможе прити на выставу, а буде мал дяку тримати в руках каталоґ, автор особисто постарат ся го переслати. «Кєд люблят ся вам моі образы і хочете помочы мі в тым, што роблю, буде то для ня великє спертя, не лем фінансове, але тіж емоцийне. […] Прошу тіж о пошырюваня мойой покірной просьбы о спертя. Дякую!» – кінчыт.

Збірку годны сте підпорити на сайті www.zrzutka.pl. Заохочаме познати ближе творчіст Мирослава Трохановского. Мож тото зробити на сайті авторской ґалериі в сіти Facebook.

Мирослав Трохановскій

Мирослав Трохановскій вродил ся в 1977 р. на чужыні, в Ґлоґові, де на выгнаню перебывали його родиче – Ярослав Трохановскій, славный Маестро ансамблю Лемковина, і Штефанія Трохановска, выдатна лемківска поетеса і орґанізацийный кєрівник колективу. По повороті Трохановскых на Лемковину, дальшы рокы жытя провюл він в Білянці при Ґорлицях.

В 1998 р. завершыл Державный Ліцей Плястичных Штук ім. Кенара в Законапым. Дальше, в 2001 р. скінчыл Поліцейне Іконоґрафічне Студиюм в Бєльску Підляшскым. В 2000 р. враз з Анном Баранович і Лідийом Трохановском основал Працовню Ікон «Мандиліон». Початково єй сідиба містила ся в Білянці. Працовня є прекурсором оновліня традициі іконописаня на Лемковині. Окрем творіня поєдных ікон на дошках, занимат ся тіж выконуваньом фресків, церковных хоругви, плащаниц і іконостасів (включні з конструкцийом). Чысленны іконы, якы з ней походят, находят ся в руках православных і католицкых єрархів, церковных спільнот і приватных осіб в Польщы і за границьом.

Oкрем іконописаня, занимат ся тіж малюнком, рисунком і різбом. Цікавит го реалистичне і абстракцийне малярство. Його творчіст то головно навязуваня до істориі украіньскых козаків, як тіж русиньскых збійників. Творит карпатскы краєвиды, лемківскы церкви, але тіж оддає ся роботі над задумом про чловечу долю, людску красу і шыроко поняту еґзистенцию.

Выстава, яку будеме мочы уж неодолга видіти, вкаже на цикль тематично повязаных образів, представляючых абстракцийне місто і будівлі. Більше з біоґрафіі Мирослава Трохановского чытайте за мотузком.

Севериян КОСОВСКЫЙ, ЛЕМ.фм

(Публікуєме в оріґіналї – лемківскім варіантї русиньского яюзыка.)