24. 10. 2023: Русины вже офіціално мають третёго члена народностного выбору

В понедїлёк, 23-го октобра 2023-го року, в просторах Уряду уповномоченого влады Словацькой републікы про народностны меншыны проходили вольбы двох новых членів Выбору про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность.

Уповномоченый про меншыны Ласло Буковскый вольбу выписав на основі зміны штатуту із 29-го септембра того року, в рамках котрой народностный выбор схвалив, же вєтнамска меншына, яка была офіціално узнана на Словакії в місяцї юн того року, буде мати у выборї єдного члена, а так само ся на основі резултатів списованя жытелїв дасть Русинам, котры мали дотеперь двох членів, о єдного веце.

Уряд уповномоченого публіковав вызву на реґістрацію кандідатів і орґанізацій, котры хотять голосовати у вольбі члена за вєтнамску і русиньску меншыну, а так само за заступинків членів выбору, публіковав 4-го октобра, і термін реґістрації быв до 17-го октобра.

За русиньску меншыну пришло лем по єдній номінації на члена і на заступника члена выбору. На члена кандідовав Мартін Караш, председа Русиньской оброды на Словеньску, котрый дотеперь быв заступником члена выбору, а на заступника кандідовав Мафтей Допіріяк, сучасный секретарь Округлого стола Русинів Словакії.

На вольбу зареґістровало ся вісем русиньскых обчаньскых здружінь, котры заголосовали за зареґістрованых кандідатів.

Одтеперь Выбор про народностны меншыны і етнічны ґрупы має за русиньску народностну меншыну трёх членів – Мартіна Караша, Петра Медвідя і Мілана Яна Піліпа, а так само двох заступників членів – Петра Штефаняка і Мафтея Допіряка.

По новому трёми представителї Русинів уж будуть участны на найблизшім засїданю народностного выбору, котре є наплановане на децембер того року.

Найвеце членів выбору, аж пять, має мадярьска народностна меншына, по нїй наслїдують Ромове із штирёма членами. Русины з трёма представителями у выборї закінчують список великых меншын. По двох членах має іщі чеська і україньска меншына, решта народностных меншын має у выборї по єднім

членови.

Петро МЕДВІДЬ, ЛЕМ.фм, языкова і ґрафічна управа: АРК в СР.