24. 3. 202: Кілько коштує сучасна ікона? Ци Мерилін піде за 200 млн дулярів?
Мерилін Монро авторства Енді Варголя то образ, котрый нюйоркскій авкцийный дім Крістіз в маю выставит на продаж. Ціна, од котрой зачне ся ліцитация, є рекордова – то 200 млн дулярів.
Образ Мерилін Монро Енді Варголь зробил в 1964 р., два рокы по смерти акторкы. Од самого початку задуманый был як сучасна, світска ікона – портрет фільмовой звізды славленой мілийонами на цілым світі.
Образ має наголовок Shot Sage Blue Marilyn і намалюваный є в типовым для Варголя стили. Схоснувал він пару інтенсивных кольорів. Волося є жолте, повікы сині, отворены воргы міцночервены, заа них видно білісі зубы. Ґамба є ружова. Мож тото одберати як маску акторкы і комедиянткы добы попкультуры.
Мерилін Монро в рекордовій ціні
Вартіст той сучасной іконы є не лем сентиментальна. Нюйоркскій авкицйный дім Крістіз, што посередничыт в выставляню образу, подал ціну, котру хотят отримати властителі штукы, Thomas and Doris Ammann Foundation з Цуріху. То 200 млн дулярів.
Офіцияльні грошы з продажы будут переданы на благодійны цілі – швайцарска фундация занимат ся філянтропійом, зберат грошы на поміч хворым дітям.
В маю пройде авкция, на котрій выставлят образ, і кєд 200 млн дулярів потвердят як ціну, од котрой буде мож зачати ліцитувати, то – як подає аґенция Ройтерс – Shot Sage Blue Marilyn буде найдорожшым образом ХХ ст., котрый коли-небуд выставили на авкиці.
Рекод за образ Варголя
Буде то тіж рекорд, кєд іде о самого Варголя. В 2013 році на авкиці в Крістіз продали інчый образ того артисты – Silver Car Crash (Double Disaster) – за дакус менше, бо 105 млн дулярів.
Ани особисты памяткы по славній Монро не вартают тілько, што тот єден єй портрет. В 1999 р. в споминаным нюйоркскым авкцийным домі ліцитували особисты річы Мерилін Монор – єй облечыня, біжутерию, меблі, нотаткы з фільмовых плянів, аж і статую Golden Globe Award, котру отримала в марци 1962 р. за свою популярніст. Разом выліцитували того на 13 млн дулярів.
Наталія МАЛЕЦЬКА-НОВАК, ЛЕМ.фм .Фото:Пресовы материялы.
(Публікуєме в оріґіналї – лемківскім варіантї русиньского языка.)
