24. 3. 2023: Елена ХОМОВА-ГРІНЁВА: Танець, Недопите... (Стишкы)

Елена Хомова-Грінёва

 

Танець

Шумнї і ясно,

аж прекрасно

сімфонія гарф

грать в руках.

Краль Давід

сидить на престолї,

любує ся танцём

дївчат.

Їх фіґуры

фешны в розпуку,

зводячі тїла

молодых березок

крутять ся довкола.

Засягне стрїла кулї сердце,

впаде опона,

мелодія стихне.

 

Наберу рати силы

кров перестає течі

загоять ся раны,

шрамы зістануть

на душі.

 

Квітнуча лука

наверне силу,

послухай як

дзвонять дзвінкы.

Глухоту вітор

не оддує,

комар сяде на чело

выссе солодку кров –

ты-сь молоком,

медом про нёго...

 

 

Недопите...

Замерзнув голос,

стихли арії,

локомотіва на

штрецї застала.

В руках віджу

свою надїю,

махам, лапам

над головов ю.

Не пущу білого ангела

до похмурного неба,

бо недопита кава

іщі мі на столї

зістала...

Script logo