24. 3. 2024: В Пряшові стрїтили ся православный і ґрекокатолицькый митрополіта

У четверь, 21-го марца 2024-го року, на Урядї Пряшівской православной єпархії одбыла ся стрїча Його Блаженства Растислава (на фотцї другый злїва), архієпіскопа пряшівского, митрополіты чеськых земель і Словакії, з Высокопреосвященым кір Йоном (на фотцї другый справа), архієпіскопом пряшівскым і митрополітом Ґрекокатолицькой церькви на Словакії.

Інформовав о тім Михал Павлишиновіч, говорця Пряшівской ґрекокатолицькой архієпархії.

„Владыка Йона, котрый перед нецїлыма двома місяцями прияв єпіскопску хіротонію і быв інтронізованый до уряду митрополіты, вєдно з владыком Растиславом в братьскій діскусії сконштатовали, же хотять продовжовати у розвитку добрых взаємных односин меджі обидвома церьквами.“

Владыка Йона так само подяковав владыкови Растиславови, же прияв запрошіня і брав участь на ёго єпіскопскій хіротонії, котра одбыла ся 27-го януара того року в Катедралнім соборї святого Йоана Крестителя в Пряшові.

„Єрархы вєдно підкреслили і факт, же є много областей, в котрых можуть як дві хрістіаньскы церькви выступати довєдна, а давати свідоцтво о Хрістови і ёго Євангелії.“ Як далше інформовав Павлишиновіч, найвысшы представителї церьквей собі на кінцю вычеряли дары, і владыка Йона запросив владыку Растислава на навщіву на Ґрекокатолицькый архієпархіалный уряд.

Петро МЕДВІДЬ, ЛЕМ.фм, языкова і ґрафічна управа: АРК в СР. Фото: Марош Черный.