24. 5. 2016: Ужгород в Будапештї

«Вседержавноє Русинськоє Самосправованя» (ВРС) в Мадярьску на 22-го мая 2016-го року приправив «Русинськоє Націоналноє Сято», в рамках котрого быв приготовленый културный проґрам. Свято Русинів у Мадярьску проходило в Народнім театрї в Будапештї.

На святочнім дню взяв участь і высокопреосвященый владыка Філіп, метрополіта Ґрекокатолицькой гайдудорожской метрополії, котрый одправив на зачатку цїлой події Паракліс. Участны були і Віктор Крамаренко, председа ВРС, як і представителї державных орґанів.

В рамках події выступав і знамый фолклорно-етноґрафічный ансамбель Ужгород, котрый того року святкує тридцять років свого єствованя. Колектів не выступать лем дома – на Українї, но і за граніцями. Своїма концертами успішно у своїй карьєрї Ужгород презентовав ся в Мадярьску, на Словакії, в Румунії, Польщі, Австрії, Нїмецьку, Італії, як і в далшых державах, быв участником і лавреатом многых міджінародных фолклорных фестівалів. За час свого єствованя ансамбель выховав веце як сто танечників, музикантів, співаків, котры презентують фолклор Закарпатя у різных державах світа. Тот рік в марцю з нагоды тридцятого юбілею ансамблю были в Ужгородї презентованы три публікації, котры суть присвячены історії колектіву.

П. М.