24. 5. 2023: В Новім Садї і Вербасї одпрезентують русиньскы книжкы

Як інформовав Михайло Фейса, председа орґанізації Руска матка, у Войводинї суть напланованы дві події, на якых будуть ся презентовати русиньскы книжкы, котры там были выданы.

У віторок, 30-го мая,  одбуде ся презентація книжкы Зоз поштаровей торби, котрой автором є Дюра Салонтай. Подїя буде проходити у Выдавательскім домі Прометей. Якраз тото выдавательство выдало книжку нашого автора. Публікація є збірков гуморесок бывшого русиньского поштаря.

На подїї будуть участны і бывшы колеґове автора, новосадьскы поштарї, вдяка чому буде нагода спознати роботу поштарів у Новім Садї в другій половинї 20-го столїтя, коли поштарї мали безпосередный контакт з людми.

На презентації буде представлена і лавреатка за карікатуру на конкурзі Коцурска чутка 2022, а орґанізаторы обіцяють і безплатны фалаткы презентованой книжкы про участных.

У четверь, 8-го юна, одбуде ся у Публічній бібліотецї Данило Киш у Вербасї презентація двох капіталных творів русинькой лексікоґрафії, і то правопису з правописным словником од Михайла Фейсы і Гелены Медєші, а анґліцько-русиньского словника, якый быв приготовленый Михайлом Фейсом, Марінов Шлемендер і Славіцов Челёвскі.

У Вербасї участным буде представлена і Мала історія Русинів, книжкы Івана Попа, котра была в минувшім роцї выдана і у бачваньскім штандардї русиньского языка.

Презентація у Вербасї орґанізує ся при нагодї сторічніцї публікованя першой ґраматікы русиньского языка під назвов Граматика бачваньско-рускей бешеди, котрой автором є Гавриїл Костельник, і 110-ой рочніцї од народжіня Гавриїла Г. Надя, наслїдника автора першой ґраматікы.

Петро МЕДВІДЬ, ЛЕМ.фм, языкова і ґрафічна управа: АРК в СР.