24. 6. 2022: Новый храм буде памятником споминаной в тым році 75. річниці выгнаня

В минулу суботу, 18. червця/юнія православна громада села Ґладышів торжественно посвятила угольный камін під будову новой церкви, яка уж неодолга стане посередині села.

Храм буде вознесеный в чест св. Йоана Крестителя – так як дотеперніня каплиця, в котрій молят ся православны селяне. Суботні богослужыня очелювал архієпископ Паісий, владыка перемышльско-ґорлицкой єпархіі ПАПЦ.

Основа будовы

В посвячыню окрем владыкы Паісия участ взяли свящечнникы з ґорлицкого і креницкого деканатів та приіздный з Украіны о. Богдан Білас. В подіі взял участ і війт ґміны Устя Рускє Збіґнєв Людвін, інжынєр Януш Ротко та выконавця конструкциі той деревяной церкви, Вєслав Тваруґ.

Наперед єпарха пояснил зобраным теолоґічный вымір обряду положыня угольного каміня, в котрым нашли ся мощы Святых Вифлеємскых Мучеників та попросил о молитву за спільне діло побудуваня ґладышівского храму.

Кульмінацийным пунктом было посвячына каміня і зложыня го до фундаментів новобудуваной церкви вєдно з ерекцийным актом, якій был підписаный прявлячым архієрейом.

Посвячыня угольного каміня і будова церкви збігла ся 75. річницьом выгнаня Русинів з Лемковины, прото тіж будова новой церкви в Ґладышові має быти памятком на тоты траґічны подіі і засвідчати про тырваня на рідній земли.

Наша, деревяна, лемківска

Властыва будова церкви має зачати ся іщы того літа. Храм буде складаный зо зрыхтуваных скорше деревяных елементів – подля первістного пляну давной незнаівской церкви.

На праздник св. Йоана Крестителя, 7. липця/юлия 2018 р. был посвяченый пляц під побудуваня церкви. Першы роботы зачали ся в листопаді/новембрі 2020 р. Будову вєдно з парохіянами розпочал попередній парох села о. Аркадий Баранчук, а успішно продолжат єй теперішній настоятель о. Ярослав Ґрич.

Деревяна церков, яка стане в середині села, буде репликом неістнуючой уж церкви свв. Космы і Даміана з Незнайовы, яка остаточно завалила ся в 70. роках ХХ ст.

Дотля православны селяне молят ся в в памятковій деревяній каплици св. Йоана Крестителя, яка находит ся при єдным з бічных пути в середині села.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)