24. 6. 2022: Юрко ХАРИТУН: Як добрї менї, І мышкы потїшать ся, Карпелї, Млин (Стишкы)

Юрко Харитун

 

ЯК ДОБРЇ МЕНЇ

Завяжте мої очі

Запхати можете і уха мої

Не виджу, не чую

але знаю

На подї моя колыска скрипить

Поставлю її серед хыжы

Покывам

Што стало ся, повім вам

виджу її

чую її

Ой як лем добрї менї!

 

І МЫШКЫ ПОТЇШАТЬ СЯ

Сиджу під стрїхов

Мачка на колїнах

погладжу її

і тїшу ся

як кебы хтось грав менї

Покы буде грати

выгравати

таку радость і мышкы

будуть мати

якы учують і вылїзуть з дїры

 

КАРПЕЛЇ

Ой якы были добры

варены

печены

Найлїпшы были суровы

Мы з них сердечка робили

дївчатам давали із любві

Я бы і теперь карпелї грыз

але зубы, зубы мої...

Вырїзую сердечка

і кладу на стіл

Може хтось покоштує їх

 

МЛИН

Мы як хлопчікы малы

на нашім потічку

зробили млин

Покы не вышов місяць

мы там сидїли

тїшыли ся

і слухали ёго спів

Покы не было чути

нашы мамкы:

Хлопцї, вечеря на столї

подьте домів

 

(З приправлёваной книжкы Юрка Харитуна – Мої пішникы.)