24. 9. 2019: Словацькый премєр участный на 75-ій рочніцї ослободжіня Калинова
У суботу, 21-го септембра 2019-го року, проходили в Калинові, в окресї Меджілабірцї, святкованя 75-ой рочніцї ослободжіня села. Калинів быв першым освободженым селом на теріторії бывшой Чехословакії.
На події брав участь і премєр Словацькой републікы Петер Пеллеґріні. По пєтнім актї кладжіня вінцїв говорив о одвазї тых, котры почас Словацького народного повстаня і Другой світовой войны стояли в першых фронтовых лініах і о надії, котру принесли. Інформовала о тім аґентура TASR. На святкованях быв і підпредседа влады Ріхард Раші. За павшых вояків была одслужена панахіда, участны могли собі посмотрити і воєньску авіацію.
Кланям ся перед героями
„Кланям ся днесь перед героями, котры в тых лїсах положыли свій жывот про нашу будучность. Суть то вартости і бої, котры собі днесь нияк не знаме представити. Про нашы молоды ґенерації є цалком непредставительным, же їх верстевници сперед 75-ёх років будили зо знанём, же ся може вже ниґда не дожыють западу сонця. Бо смерть была тов найзвычайнїшов справов у їх втогдышнїм жывотї,“ повів у Калинові премєр.
Як продовжовав, і вдяка тым величезным пожертвованям днесь жыєме жывотом, котрый ся не дасть порівняти зо жывотом нашых отцїв і дїдїв. Премєр апеловав, жебы мали люде в почливости тых, котры воёвали за свободу.
У своїм прояві підкреслив, же за освободжіня Словакії заплатила найвысшу цїну Червена армада і вєдно з нёв боюючі Чехы і Словаци а „представителї многых далшых народів і армія Румунії.“ Хоць святкованя проходили в русиньскім селї, Русинів боюючіх за ослободжіня премєр не спомюнув. При ослободжіню Калинова вмерло 1200 совєтьскых вояків.
Сімбол ослободжіня
Член Централной рады Словацького союзу протифашістічных бойовників Ян Угрік описав Калинів як сімбол ослободжіня.
„Тутешнёв пєтнов громадов ся в Словацькій републіцї шторік одкрывають споминовы святкованя ослободжіня нашых сел і міст,“ повів. Звернув увагу на то, же выбоёваны вартости сьме повинны сторожыти.
В рамках святковань была розказом міністра обороны Словацькой републікы Петра Ґайдоша удїлена Памятна медайла ку 25-ій річніцї выникнутя Озброєных сил Словацькой републікы Янови Штефанікови і Памятна медайла ку 75-ій річніцї Словацького народного повстаня і закінчіню Другой світовой войны селу Калинів.
Оцінёвав і Клуб ґенералів Словацькой републікы. Селу Калинів удїлив із нагоды 75-ой рочніцї ослободжіня Заслужный хрест Рудолфа Віеста І. ступня, Памятну медайлу Яна Ґоліана ІІ. ступня собі зо святковань однесли Марія Реґрутова і Анна Балеёва.
Святкованя коло обновленого памятника
Святкованя 75-ой рочніцї ослободжіня Калинова в суботу проходили коло обновленого памятника.
Як інформовав аґентуру TASR староста села, оправа тырвала рік і вытраты были в сумі понад 110 тісяч евр. 81 тісяч Калинів здобыв з еврофондів, 30 тісяч дала селу влада почас выїздового засїданя в Меджілабірцях.
Памятник освободжіня выбудовали в роцї 1964 із нагоды 20-ой рочніцї ослободжіня. Автором є русиньскый академічный скулптор Франтїшек Ґібала, котрый походив із села Крайна Поляна в окресїі Свідник. Тот зобразив совєтьского вояка, котрый тримать в руках над головов дїтину, сімбол нового жывота на ослободженій теріторії.
Петро МЕДВІДЬ, ЛЕМ.фм, здрой фотоґрафії: Peter Pellegrini.
