25 . 2. 2023: Studium Carpatho-Ruthenorum вертат по перерві

Вчас лекций ученикы познают культуру вшыткых реґіонів Карпатской Руси, в тым Лемковины. 

Літом одбуде ся дальшый, 11. уж річник Медженародной Літньой Школы Русиньского Языка і Культуры Studium Carpatho-Ruthenorum 2023. Інформує о тым Інститут Русиньского Языка і Культуры Пряшівского Університету, якій єст орґанізатором подіі.

Літня Школа вертат по долшій перерві, кєд же остатній раз проходила она в 2019 р. – была то ювілейна 10. едиция подіі.

Першый річник Studium Carpatho-Ruthenorum был орґанізуваный в 2010 р. В остатніх штырьох роках подія ся не одбывала, што спричынене было пандемійом. В 2020 р., коли шор ріжных русиньскых подій был зрушеный, одкликана была і Літня Школа.

В тым році Studium Carpatho-Ruthenorum буде проходило в днях од 11. червця/юнія до 1. липця/юлия. Детальный проґрам вчыня і товаришучых подій буде іщы публикуваный.

Studium Carpatho-Ruthenorum

Тот тритыжньовый едукaцийный проєкт є каждоразово заміряный на вчыня русиньского языка, істориі, літературы, культуры і етноґрафіі карпатьскых Русинів. Прото вчас лекций ученикы познают культуру вшыткых реґіонів Карпатской Руси, в тым Лемковины.

Выклады ведены сут по русиньскы і анґлицкы заграничныма і домашніма науковыма робітниками і дослідниками. Участ в Studium Carpatho-Ruthenorum берут Русины і іх потомны з ріжных держав світа.

В рамках Літньой Школы окрем лекций є рыхтуваный для єй участників і додатковый проґрам товаришучых акций. В попередніх роках были то м.ін. культурны подіі, в котрых брали участ ученикы, звиджаня русиньскых інституций і орґанізаций ци прогулькы по Пряшівскій Руси і Лемковині.

За єденадцет річників, котры проходили з перервами, Літню Школу завершыло більше як 210 студентів. Є то єдина русиньска літня школа того типу во світі.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)