25 . 3. 2022: Мож подавати номінації на Pro Arte Ruthenorum 2022

Премія удїлює ся од 2020-го року.

Як інформовав председа журї Націоналной премії за русиньске уменя імени Івана Манайла Pro Arte Ruthenorum – Андрій Манайло, уж мож подавати номінації на премію на 2022-ый рік.

Основателями премії за русиньске уменя є Світовый конґрес Русинів і Русиньске націоналне самосправованя міста Вац в Мадярьску. Премія была основаня почас 15-го Світового конґресу Русинів, котрый у 2019-ім роцї проходив у Любовняньскых Купелях.

Затля двоми лавреаты

Цїлём основаня премії є підпора і оцїнїня тых сучасных русиньскых умелцїв, котры своёв умелецьков творчостёв зробили значный вклад до розвитку і пропаґації світового русиньского уменя.

Премія, в рамках котрой лавреат дістане ґравіровану крішталёву трофей з подобов Івана Манайла, діплом і матеріалну підпору умелецького дїятельства в сумі 200 000 форінтів (коло 530 евр), удїлює ся од 2020-го року. О лавреатови вырїшує журї Комісії про културу Світовой рады Русинів.

Першым лавреатом у 2020-ім роцї став русиньскый малярь із Підкарпатя Володимір Микита. З причіны пандемії му была премія передана аж у 2021-ім роцї. Лавреатом за 2021-ый рік став Владо Няряди із Сербії, і премію перевзяв за лавреата на 16-ім Світовім конґресї Русинів у Криніцї Дюра Папуґа.

Номінації уж мож подавати

Подаваня номінацій уж было спущено на сайтї премії. Номінації можуть приходити з цїлого світа. У пропозіції на номінанта має быти ёго мено і коротка біоґрафія, обоснованя на номінацію і ілустратівный матеріал ёго тврочости.

Номінації мож передкладати тот рік до 15-го апріля. Святочне удїлёваня Націоналной премії за русиньске уменя імени Івана Манайла Pro Arte Ruthenorum одбуде ся почас Бєнале русиньской/лемківской културы в Криніцї, котре буде проходити 28-го і 29-го мая того року.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.