25. 10. 2023: ПСК выдїив на поміч по землетрясїню 100 тісяч евр
Пряшівскый самосправный край (ПСК) выдїлив із свого розрахунку 100 тісяч евр на поміч людям, котрых засягло недавне землетрясїня. Грошы роздїлить Фундація ПСК про підпору родины меджі людей.
Як інформує аґентура TASR, посланцї Заступительства Пряшівского самосправного краю то схвалили на своїм засїданю, котре одбыло ся в понедїлёк 23-го октобра 2023-го року.
Грошы при тім дістануть лем фізічны особы. Можуть їх схосновати на реконштрукцію дому, квартелю або на купліня заряджіня, котре было пошкоджене. Наслїдно треба схоснованя грошей здокументовати.
Прибывають грошы на банковім рахунку
Справця Фундації ПСК про підпору родины Віктор Ґуман повів, же на банковім рахунку прибывають фінанції.
„Їднаме з двома великыма корпоратныма фірмами, котры нам хотять помочі. Нашым цїлём є вызберати холем 150 тісяч евр, котры бы сьме хотїли такой перероздїлёвати. По днешнїм Заступительстві ПСК вже маєме коло 120 тісяч евр і тота сума каждый день росне,“ доповнив Ґуман з тым, же ку понедїльку евідовали 134 жадостей о підпору.
Єдночасно додав, же села, котры были засягнуты землетрясінём, а не залучіли ся до меморандума о фондї, не можуть черьпати грошы з крізового фонду. Дакотры з них по выникнутю фонду у 2019-ім роцї ся залучіли, но наслїдно перестали грошы платити.
„То лем десять центів на жытеля за рік. З крізового фонду знаме ґарантовати, же в припадї будьякой надзвычайной сітуації в данім селї або містї будеме выплачати суму 700 евр на жытеля,“ уточнив справця фундації.
Жупан вірить, же поможе і влада
Председа ПСК Мілан Маєрьскый вірить, же і нова влада выдїлить грошы на поміч людям по землетрясїню.
„Про нас є ключовым і прияте узнесїня ПСК, і то, жебы влада Словацькой републікы пожадала Европску комісію о фінанчны средства в рамках Фонду солідарности Европской унії,“ повів жупан з тым, же ПСК буде правдоподобно жадати о фінанції про Вігорлатьскый музей в Гуменнім, де є шкода по землетрясїню приблизно 300 тісяч евр.
Єдночасно очекує, же в слїдуючім роцї буде мати край свою Вызву про реґіон прямену на поміч засягнутым селам і містам, жебы годны были оправити свої школьскы або културны інштітуції.
Помагають і далшы
Людям в Пряшівскім самосправнім краю помагають і далшы доноры. О выдїлїню фінанчной помочі про жытелїв ПСК інформовало уж скорїше Малопольске воєводство, котре має граніцю і є партнером з Пряшівскым самосправным крайом.
На недїлю, 5-го новембра 2023, выголосив збераня грошей у вшыткых храмах Пряшівской архієпархії апостольскый адміністратор і братїславскый єпарха, владыка Петро Руснак. Грошы мають помочі на змірнїня шкод, котры зробило землетрясїня на храмах архієпархії, фарьскых будовах, але і на пріватных домах.
Петро МЕДВІДЬ, ЛЕМ.фм, языкова і ґрафічна управа: АРК в СР.
Фото: TASR – Марош Черный.
