25. 12. 2022: ПСК дав грошы на далшы народны културны памяткы в русиньскых селах

Як інформовало Оддїлїня комунікації і пропаґації Пряшівского самосправного краю (ПСК), ґрантовый проґрам ПСК з назвов Вызва про реґіон уможнив реалізацію далшых атрактівных проєктів у области културы.

Найновше край поміг сохранити народны културны памяткы в Кежмарку, Спішскій капітулї, Стражах під Татрами, і в двох русиньскых селах – Калинові, в окресї Меджілабірці, і Ольшавіцї, в окресї Левоча.

В першім ослободженім селї на теріторії бывшой Чехословакії, в Калинові, зреалізовав ся проєкт обновы інтерьєру і екстерьєру містной народной културной памяткы – Ґрекокатолицькой церькви Успенія Пресвятой Богородіцї.

Класіцістічный храм візантійского тіпу быв збудованый в роцї 1800 і реконштрукція реалізовала ся в трёх фазах. Вымінили ся облакы, зробило ся одводнїня, оправили ся ваковкы і зробила нова іншталація електрикы.

Проєкт ПСК підпорив сумов 20 тісяч евр, і реконштрукція принесла злїпшіня ставебно-технічного стану обєкту, охрану ёго історічных мурованых конштрукцій, а в непослїднім шорї ся звекшыла памяткова вартость калинівской церькви.

В селї Ольшавіця, де доднесь сохранили ся деревяны хыжы, уможнила 20-тісячова крайска дотація реконштрукцію народной културной памяткы – сыпанця. На обєктї, котрый быв до великой міры пошкодженый по великых зливах, обновили ся зрубовы пошкоджены части. Сыпанець затїснив ся іловитов мазанинов і натер вапяным молоком.

Справцём предметного обєкту є село, і по реконштрукції бы сыпанець мав в рамках розвитку турістічного руху быти приступный турістам.

Пряшівскый самосправный край в рамках Вызвы про реґіон посередництвом проґраму Підпора обновы културных памяток UNESCO і народных културных памяток лем в тім роцї підпорив 23 проєктів з алокаціёв понад 940 тісяч евр.

Петро МЕДВІДЬ, ЛЕМ.фм. Ґрафічна і языкова коректура: АРК в СР.