25. 3. 2022: Братїславі проходить выстава книжок і часописів про дїти і молодеж народностных меншын

BIBIANA – Меджінародный дом уменя про дїти, приготовила од 24-го марца до 24-го апріля 2022-го року в Ґалерії Душана Ролла в Братїславі выставу книжок і часописів про дїти і молодеж народностных меншын, котры жыють на Словакії, під назвов #slovo#jazyk#kniha (#слово#язык#книга).

Як інформовав за орґанізатора Юрай Шебеста, выстава є малым „святкованьом“ Меджінародного дня материньского языка, котрый є 21-го фебруара, і Меджінардного дня книгы про дїти, якый ся припоминать 2-го апріля.

Ку тринадцятём народностным меншынам, котры суть узнаны на Словакії, орґанізатор придав і вєтнамску меншыну, котра дотеперь на Словакії офіціалный статус меншыны не має.

„Выставов #slovo#jazyk#kniha мы вырїшыли презентовати і підпорити творчость про дїти і молодеж народностных меншын, котрой цїлём є припомянути, спознавати, сохраняти і розвивати материньскы языкы як дїдовизну предків, цїнну часть ідентічности,“ інформовав Шебеста.

На выставі мож відїти образковы книжкы, повістї, книжкы про молодеж, приповідкы ці лепорела з продукції властных выдавництв народностных меншын, далшы з книжковых фондів, котры собі меншыны будують з книг привезеных з матерьскых держав, або їх перекладів до словацького языка. Дїти чекають і різны гры як пексесо ці омалёванкы.

Выстава збогачена є о книжкы з фонду бібліотекы, яку має BIBIANA, в котрій найдеме цїнны тітулы з цїлого світа, якы здобыли різны меджінародны оцїнїня за авторьскы ці ілустрачны оброблїня.

„Хоць суть книжкы писаны в різных языках, мають много сполочного – в каждій приповідцї справедливость все переможе, зло є покаране, правда наконець вкаже ся, і добрых всядыль много змістить ся,“ додав за орґанізатора Юрай Шебеста.

 

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.