25. 3. 2024: Еміґрацийны кругы припомнули історию Лемківской Республикы

Будує факт, што лемківска істория цікавит дальшы ґенерациі потомных лемківскых еміґрантів.

10. марця 2024 р. в американьскым Йонкерс одбыла ся подія посвячена Рускій Народній Республиці Лемків (1918-1921). Стріча притягнула близко сотку осіб, якых заінтересувала тема лемківской соспільно-політичной діяльности сперед більше як стох років.

Орґанізатором подіі был Карпаторусиньскій Америцкій Центр Lemko Hall (Carpatho-Rusyn American Center Lemko Hall) в Йонкрес.

Головну доповід на тему істориі Лемківской Республикы выголосил др Богдан Горбаль, єден з теперішніх діячів реактивуваного давного Лемко-Союза в ЗША і Канаді. «Богдан Горбаль мал прекрасну презентацию. Было чудово, люде слухали з великым заінтересуваньом» – реляцийонує Андрий Медвід, еміґрацийный діяч і єден з орґанізаторів подіі.

Стріча мала характер одкрытой дискусиі, о чым уж предше інформували орґанізаторы, штобы заохотити участників до зрыхтуваня тематичных звідань до прелеґента. По выголошеным выкладі, Горбаль одповідал на подаваны присутныма вопросы.

Подля Медвідя, окрем того, што стріча заінтересувала дост великє чысло люди, вказала на іщы єдну справу. «Ціла презентация была по анґлицкы. В єдным пункті мойой доповіди перешол єм на лемківскій, на може 30-40 секунд, а потім звідал єм ся, хто мене розуміє, як я бесідую, най двигне руку. Зачудувал єм ся, бо коло 80% [присутных – прип. ред.] піднесло руку, а былa понад сотка люди. Што мене тіж піднесло на духу то тото, што было тіж понад двадцетеро молодых» – констатує з надійом Медвід.

На жаль, молоды ґенерациі потомных з Лемковины уж такой не комунікуют ся по лемківскы. То тым більше подіі того рода сут потрібны, жебы не лем защыпляти серед дальшых лемківскых ґенераций в Америці почутя приналежности, але тіж малыма кроками старати ся приближати знаня лемківского языка, якым іщы донедавна розправляло великє чысло еміґрантів зо Старого Краю.

Сам Йонкрес історично являт ся міцным осередком лемківства в ЗША. Днес за справом діяльности такых орґанізаций як рекативуваны Lemko Hall ци Лемко-Союз од парох шумных років в ЗША і Канаді оджыват соспільне жытя лемківской еміґрациі (і в більшости потомных тых, што подали ся за океан перед вельома роками).

Lemko Hall i Лемко-Союз хотят продолжати того рода стрічы, а при тым орґанізувати цикличны подіі як дотепер – Лемківскій Русальный Пікнік і осінній Лемківскій Кєрмеш.

Севериян КОСОВСКЫЙ, ЛЕМ.фм.

(Публікуєме в оріґіналї – лемківскім варіантї русиньского языка.)