25. 4. 2022: Папа Франціск прияв зречіня ся уряду пряшівского архієпіскопа і метрополіты

Абдікація была подана іщі 24-го фебруара.

Як інформовало 25-го апріля 2022-го року Пресове оддїлїня Святїшого Престола, Папа римскый Франціск прияв зречіня ся пастырьского ряджіня Пряшівской архієпархії архієпіскопом і метрополітом Йоаном Бабяком.

Єдночасно Вселеньскый Архієрей призначів владыку Петра Руснака, братїславского єпарху, за апостольского адміністратора sede vacante (порожній столець) Пряшівской архієпархії. Пресову канцеларію Конференції єпіскопів Словакії о тім інформовала Апостольска нунціатура на Словакії.

Про добро і покій Церькви

Ку абдікації дав своє выголошіня і владыка Йоан Бабяк. В нїм пише, же по многых роках службы про Ґрекокатолицьку церьков sui iuris (свого права) на Словакії в службі їй першого архієпіскопа метрополіты, по молитвах і духовнім розрізняню іщі 24-го фебруара того року пожадав Папу Франціска о увольнїня з функції архієпіскопа і метрополіты.

„Одходжу про покій і про добро Церькви, єпіскопів, священиків і віруючіх,“ пише архієпіскоп у выголошіню.

Владыка окрем іншого подяковав за жертвенну службу священикам і віруючім за хрістіаньскый жывот і сполуучасть на жывотї Ґрекокатолицькой церькви на Словакії. Пожадав о одпущіня і высловив жаль, покля односно дакого не быв достаточно чутливый, і не наповнив ёго очекованя.

Владыка так само написав, же далше буде споєный в молитвах із єпіскопами, монахами, діаконами і віруючіма Пряшівской архієпархії, „котра зіставать глубоко заскіпена в моїм сердцї. Так само зіставам споєный з цїлов Ґрекокатолицьков метрополітнов церьквов sui iuris на Словакії, котрій жычу далше наростаня, проквітаня, многы Божы благословлїня і покров Пресвятой Богородіці.“

Біоґрафія владыкы Йоана Бабяка, СІ

Народив ся владыка Йоан Бабяк 28-го октобра 1953-го року в Гажіні над Цірохов, в окресї Гуменне. По закінчіню гуменьской ґімназії продовжовав штудовати на Кіріломефодійскій богословскій факултї в Братїславі. В тім часї Ґрекокатолицька церьков у Чехословакії не мала свою факулту ани семінарію, ґрекокатолицькы богословы, в поволеній комуністічным режімом кількости, могли штудовати лем в на римокатолицькій факултї в Братїславі.

Рукоположеный на священика быв 11-го юна 1978-го року в Пряшові крижевацькым владыком Йоахімом Сеґеди.

Быв капланом у Пряшові, пак справцём парохії в Любіцї, рік префектом і спірітуалом в братїславскій семінарії, і в роках 1990 – 1991 капланом Парохії Воздвиженія Честного Креста в Братїславі. В роцї 1987 тайно вступив до Сполочности Ісусовой (єзуіты). Часть 1990-ых років жыв у Римі, де на Папскім восточнім інштітутї зробив собі ліценціат і докторат.

В роках 1997 аж 2002 быв директором Центра спірітуаліты Выход-Запад Михала Лацка в Кошыцях, єдночасно чітав лекції на Ґрекокатолицькій богословскій факултї в Пряшові і на Теолоґічій факултї Тырнавской універзіты. Учів восточну спірітуаліту.

Мав богате публікачне діятельство, занимав ся літературов факту. Вызначнов є публікація у 8-ох томах Зісталы вірны (Zostali verní).

За пряшівсого єпархіалного єпіскопа быв выменованый 11-го децембра 2002-го року, рукоположеный на єпіскопа быв 6-го януара 2003-го року Папом римскым Йоаном Павлом ІІ. в Базиліцї св. Петра в Римі. Інтронізованый быв у Пряшові 18-го януара.

30-го януара 2008-го року Вселеньскый Архієрей Венедікт XVI. реорґанізовав Ґрекокатолицьку церьков на Словакії на метрополітну церьков sui iuris із центром в Пряшові. За першого пряшівского архієпікопа і метрополіту выменовав довтогдышнього пряшівского єпарху Йоана Бабяка. Інтронізованый быв 17-го фебруара 2008-го року в Пряшові.

Архієпікоп Бабяк почас своёй єпіскопской службы вынятково актівно старав ся о розбудованя главно двох маріяньскых путницькых місць Пряшівской єпархії – Лютины і Літмановой. Обидві місця суть споєны з папксков Базиліков Санта Марія Маджоре (Santa Maria Maggiore) в Римі. Причінив ся і о афіліацію Храму Воздвиженія Честного Креста на Буковій Гірцї з Базиліков св. Петра в Римі.

На жадость владыкы Бабяка, по сповнїню строгых крітерій, Ґрекокатолицька теолоґічна факулта Пряшівской універзіты была приєднана до звязку церьковных факулт акредітованых Конґреґаціёв про католицьку выхову. За веце як 19 років своёй єпіскопской службы рукоположыв 176 священиків, было збудованых у Пряшівскій архієпархії 35 новых храмів, 53 фарьскых будов і 9 квартелїв про капланів.

Апостольскый адміністратор Петро Руснак

Новый апостольскый адміністратор Пряшівской архієпархії, владыка Петро Руснак, народив ся 6-го септембра 1950-го року в Гуменнім до родины ґрекокатолицького священика, котрый быв почас комуністічного режіму переслїдованый і выгощеный з цїлов своёв родинов на Чехы. По часї могли вернути на теріторію Словакії, але лем з тым условієм, же будуть жыти в Братїславі.

У 1982 роцї вступив до семінарії і зачав штудовати теолоґію в Братїславі. Рукоположеный быв 14-го юна 1987-го року в Пряшові. В роках 1987 аж 1990 быв душпастырём в різных парохіях як каплан, пак як парох. У 1990-ім роцї став спірітуалом в Ґрекокатолицькій семінарії в Пряшові і актівно брав участь на їй обновлїню.

В роках 1995 аж 1998 быв єпіскопскым вікаріём і канцеларём Єпархіалной курії в Пряшові. Од 1990-го до 2003-го року учів пасторалну теолоґію і гомілетіку на Ґрекокатолицькій теолоґічній факултї в Пряшові.

В роцї 1998 вернув ся до актівного душпастырьства, быв парохом в Бардеёві, од 2003-го року быв парохом і деканом в Братїславі.

30-го януара 2008-го року быв Папом римскым Венедіктом XVI. выменованый за першого братїславского єпарху. Рукоположеный на єпіскопа быв 16-го фебруара 2008-го року в Пряшові руками кардінала Йозефа Томка, владыкы Йоана Бабяка і владыкы Мілана Хаутура. 9-го марца того самого року быв у Братїславі інтронізованый.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.