25. 4. 2024: Вмерла Ольґа Ґлосікова, перша директорка русиньского музея

Як інформовала родина, в середу, 24-го апріля 2024-го року, у віцї 71 років вмерла Ольґа Ґлосікова, перша директорка Словацького народного музея – Музея русиньской културы в Пряшові.

Народила ся ПгДр. Олґа Ґлосікова, др. н., 24-го марца 1953-го року. Была родачков із русиньского села Камюнка, Старолюбовняньского окресу. Высокошкольскы штудії абсолвовала на Філозофічній факултї Універзіты Павла Йозефа Шафарика в Пряшові, в шпеціалізації філозофія – історія.

По штудіях зачінала як учітелька на ущілищу в містї Світ. Пак стала одборным асістентом на Высокій школї технічній в Кошіцях із резідованём у Пряшові, днесь Технічна універзіта в Кошіцях.

У 1990-ім році кандідовала до словацькой части Сеймовнї народів Федералного згромаджіня (єдна із двох палат чехословацького парламенту), за Комуністічну партію Словакії, котра была теріторіалнов частёв Коміністічной партії Чехословакії. До парламенту наступила аж додаточно, у октобрї 1991-го року. В парламентї была до юна 1992-го року, коли одбыли ся далшы парламентны вольбы.

По куртій політічній карьєрї далше была высокошкольскым педаґоґом на Технічній універзітї в Кошіцях з резідованём у Пряшові. У 2005-ім роцї здобыла тітул доктора наук на Філозофічнім інштітуті Націоналной академії наук Білорусії. Публіковала высокошкольскы учебникы з філозофії, реліґіоністікы, псіхолоґії, соціолоґії роботы і манажменту, соціолоґії і промысловой псіхолоґії.

Ку 1-му януару 2007-го року офіціално выникнув Словацькый народный музей – Музей русиньской културы. На директора той інштітуції быв выписаный конкурз, котрый на кінцю фебруара 2007-го року выграла Олґа Ґлосікова, і стала так першов директорков русиньского музея. У тій функції была до апріля 2019-го року.

Ґлосікова мусила інштітуцію почати будовати од фундаменту. Музей не мав ани збірковы фонды, а ани будову. Музей під їй веджінём быв у арендованых просторах одкрытый про людей у фебруару 2008-го року.

У 2011-ім роцї подарило ся здобыти про музей будову, де даколи были касарнї. Музей пак быв, жебы ся перебрати до новой будовы, котра потребовала ставебно приспособити ся холем дакус, од апріля 2012-го року запертый, а то аж до децембра 2013-го року, коли ся отворив про навщівників.

Ольґа Ґлосікова вступила з музеём у 2012-ім роцї до Округлого стола Русинів Словакії. Почас свого дїяня у функції директоркы подарило ся їй выбудовати першы сталы експозіції музея і зачати повнити збірковы фонды.

Вічная память!

Петро МЕДВІДЬ, ЛЕМ.фм, языкова і ґрафічна управа: АРК в СР.