25. 6. 2023: В Кошіцях одпремєровали філм о Варголови

Од 16-го до  23-го юна 2023-го року проходить в Кошіцях вже 29-ый рочник меджінародного філмового фестівалу Art Film Fest. Почас вісем фестіваловых днїв мала публіка можность відїти 146 філмовых продукцій із штирёх контінентів світа.

Якраз на Art Film Fest было мож відїти в четверь, 22-го юна, і цїлосвітову премєру нового цїловечурнёго документарного філму з назвов Енді Варгол – америцькый сон (оріґ. Andy Warhol – americký sen). То філм є режісера Яна Любоміра Сливкы і сценарісткы Петры Бабіч Сливковой.

Копродукчным партнером нового філму є Музей модерного уменя Енді Варгола в Меджілабірцях. Філм на фестівал пришов представити єден із протаґоністів, сын брата Енді Варгола, вызначный книжковый ілустратор Джеймс Варгола, котрый пришов із Споєных штатів Америкы із своёв женов.

Як повіли творцї документарного філму про Rádio Devín, Енді Варгол – америцькый сон дістане ся до дістрібуції аж в осени 2023-го року. В Кошіцях быв премєрованый як Work in Progress, значіть іщі в процесї выробы.

Як дочітаме ся в анотації філму, Енді Варгол – америцькый сон є о жывотї і творчости єдного з найвекшых світовых вытварных умёлцїв із корїнями у селї Микова на выходї Словакії.

„Інтімна історія родины Ендія, просаджіня ся на ню-йорскій умелецькій сценї, здобытя світовой славы і овпливнїня умелецькых штілів через многы жанры. То вшытко выповіджено посередництвом выповідей членів родины і знамых, меджінародных одборників і кунстісторіків. Оповнюють їх автентічны знимкы зо жывота Ендія на двох контінентах,“ пишуть творцї документарного філму.

Філм точів ся в Миковій, в Меджілабірцях, але і в Піттсбурґу а на далшых місцях на двох контінентах. Вдяка Джеймсови Варголови ся філмовый штаб дістав і до родного дому Енді Варгола. Як повів режісер філму про денник Korzár, то, о чім є філм, ся дає выразити бонмотом, котрый Енді Варгол радо хосновав: „I am from nowher”, значіть „Єм нивыдкы“.

Дефінітівна подоба бы мала быти така, же про телевізію з того будуть два філмы, а як повів режісер Сливка, матеріалу мають тілько, же бы хотїли пак зробити іщі третїй філм, котрый бы мав быти о сполупрацовниках Варгола, і о ёго жывотї по атентатї.

Петро МЕДВІДЬ, ЛЕМ.фм. Языкова і ґрафічна управа: АРК в СР.

Фото: TASR