26. 1. 2022: Презідентка: „Резултаты списованя бы ся мали інтерпретовати прязно в одношіню ку меншынам.‟

Резултаты Списованя жытелїв, домів і квартелїв 2021 бы ся мали інтерпретовати в одношіню ку народностным меншынам прязно. Презідентка Словацькой републікы Зузана Чапутова то написала у 26-го януара 2021-го року на соціалній сітї Facebook.

Представителї меншын суть подля презіденткы в неістотї, бо державны орґаны дотеперь не высловили ся, якым способом будуть даны, котры дотуляють ся народностей, інтерпретованы.

„При вопросах меншыновых прав бы ся мало выходити зо списованя обидвох народностных катеґорій (обидвох вопросів, позн. ред.), котры были в методіцї Штатістічного уряду браны за рівноціны. Про розрїшіня страхів думам, же є потрібне в комунікації з представителями народностных меншын в штонайкоротшім часї доїднати і єднотну інтерпретацію односных правных норм,“ выголосила презідентка.

Списованя подля главы державы потвердило, же Словакія є країнов з вызначным чіслом народностных меншын. Вказала на то, же аж 300 000 обывателїв схосновало можность приголосити ся ку двом народностям.

„І тоты дата суть жрідлом лїпшого познаня сполочности, котру твориме,“ підкреслила презідентка. Даны о народности має глава державы за основу про реалізацію меншыновых прав уможнюючіх розвивати свою културу, освіту ці материньскый язык.

 

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.