26. 1. 2024: Місто бунту

Словакія собі може підскаковати лем вдяка Унії і НАТО.

Су-чоу є кітайске місто на току рікы Ян-це-тьян, котре має подля послїднїх доступных даных, якы суть із 2017-го року, 5 380 000 жытелїв. Словацька републіка мала ку марцу 2023-го року 5 426 857 жытелїв. Значіть великость Словакії за чіслом жытелїв є на уровни 16-го найвекшого кітайского міста.

Словацькый премєр Роберт Фіцо, котрый веде країну під Татрами од октобра минувшого року, радо бісїдує о тім, же він і ёго влада хотять робити загранічну політіку на вшыткы штири світовы стороны, же хоче робити горду, народну політіку, в котрій на першім місцї суть інтересы Словакії, хоснує в тій темі фразы так добрї знамы од вшыткых популістів світа, котры бы собі могли подля взору з добы перед 1989-ым роком взяти за своє мотто: Популісты вшыткых країн соєдиняйте ся.

Кедь ся посмотриме на то, што бісїдує, і на то, што пак є реалностёв, загранічна політіка має далеко од того, што Фіцо декларує. Прикладів є веце.

Наприклад, кедь пришов до Мадярьска, Віктора Орбана не жадав, жебы уж ниґда не бісїдовали в Будапешті в рамках офіціалных форумів о Фелвідеку, жебы мадярьска влада не скуповала будовы і фундушы на Словакії, але як такый малый школярик при великім учітелёви выхвальовав словацько-мадярьскы односины, бісїдовав о тім, як много того мають тоты дві країны, розумій Фіцо і Орбан, сполочного, а вшытко было в найлїпшім порядку.

Іщі веце траґімкомічным суть ёго остры слова проти Брусела, котрыма кормить свою базу людей, котры на нёго і ёго партію голосують, но реално дотеперь заголосовав за вшытко, за што голосовати треба было в Бруселії і в тых припадах, коли Мадярско не голосовало.

Кедь Словакія підписала оборонный договор із Споєныма штатами Америкы, партія Роберта Фіца роздістрібуовала по цїлій країнї білборды з фотками посланцїв, котры за тот договор голосовали, і были на них означены як велезрадници. До минуты втогды Фіцо хотїв зрушыти договор, покля буде при властях. Днесь ёго горда загранічна політіка хоче лем отворити тот договор, котрый має Братїслава із своїм союзником з НАТО, і зробити зміны. Но договор не зрушыли, вояци НАТО на теріторії Словакії суть, нелем америцькы, а Роберт Фіцо знать, же і тым ся звекшує безпечность країны.

Українї так само не буде словацька влада помагати воєньскы, але ліценції про пріватны зброярьскы фірмы Фіцова влада підписала, а зброя ся далше може на Україну експортовати. А в Кієві то добрї знають, зато і по досправды шкандалозных словах Роберта Фіца не была зрушена стрїча премєрів, котра одбыла ся в Ужгородї.

Было бы мож продовжовати в рахованю прикладів, котры доказують, же політіка Фіца є двотварьна, а абсолутно ніч не має з тым, што о своїй загранічній політіцї сам декларує. Єдине, што платить, то є досправды то, же хоче робити політіку на вшыткы штири світовы стороны, но якраз тото в реалности значіть лем єдно, же Словакію посувать ближе ку Уралу і Великому кітайскому муру.

Самособов, кажда політічна ґарнітура має право робити свою загранічну політіку, а я акцептую резултаты волеб. Но робити тото, што днесь робить Роберт Фіцо, є проти інтересам країны, а є лем вопросом часу, доколи Францію, Нїмецько буде бавити платити колос тіпу Европска унія, кедь на другім кінцю того колосу бы сьме грошы радо взяли, а єдночасно собі і радо до них копали.

Безпечность Словакії, в каждім смыслї, од господарьской аж по воєньску, є ґарантована якраз тым, же Словакія є членом Европской унії і Североатлантічной аліанції. А Словакія собі може підскаковати лем вдяка Унії і НАТО. А то платить і про Мадярьско. Обидві країны мають скушеность, коли в такых штруктурах не были, і напоходовали їм там чуджі войска а утисли їх.

Покля бы Словакія в западных штруктурах не была, пак бы была лем такым єдным векшым кітайскым містом, в котрім хтось робить бунт. Кедь Фіцо бісїдує о політіцї на вшыткы штири світовы стороны, мож собі легко представити, што такый кітайскый режім, котрый про Фіца так само не є проблемов, зробив бы з єдным містом бунту.

На Словакії нас чекать барз інтересный час. Хочу вірити, же ся не подарить в тім функчнім періодї здемоловати абсолутно вшытко, што з той країны робить країну демократічну і западну.

Петро МЕДВІДЬ. Статя была написана як коментарь „Вступне до контроли“ лемківского радія lem.fm. Языкова і ґрафічна управа: АРК в СР.