26. 11. 2022: Равас: Влада не хоче народностный закон. Спустила ся електронічна громадна припомінка

Нерїшіня закона є неакцептовательным про меншыны.

Влада Словацькой републікы не хоче схвалити закон о народностных меншынах, інформує Абел Равас, соціолоґ, презідент Інштітуту Матєя Бела і бывшый уповномоченый влады Словацькой републікы про ромскы комуніты.

Людей і орґанізації Равас на своїм офіціалнім сайтї на сітї Facebook вызывать, жебы електронічно підписали громадну припомінку, котру спустив Інштіту Матєя Бела на порталї mojapeticia.sk, якый справує обчаньске здружіня VIA IURIS.

Влада зо законом не рахує

Як пише ся в текстї ку громадній припомінцї, 21-го новембра 2022-го року Уряд влады передложыв пропозіцію плану леґіслатівных задач (ПЛЗ) на рік 2023 до меджірезортного припомінкогово процесу. План є стратеґічный матеріал, котрый дефінує леґіслатівны задачі влады, міністерстев і централных орґанів державной справы на далшый період.

Но в споминанім матеріалї не є спомянута пропозіція закона о поставлїню народностных меншын, ани планованый термін ёго схвалїня.

„Тот факт є о то важнїшый, же ПЛЗ на рік 2022 таку пропозіцію іщі обсяговав, і то з терміном май 2022,“ пише ся в тексті ку громадній припомінцї. Як далше інформують інціаторы припомінкы, з медіалізованых інформацій ся знать, же Уряд уповномоченого влады СР про народностны меншыны пропозіцію закона приготовив.

„Но матеріал ся в роцї 2022 (затля) не дістав до леґіслатівного процесу. Зато фаховы кругы очековали ёго зараджіня до ПЛЗ в році 2023. То, же ся так не стало, не є акцептовательным з погляду народностных меншын.“

Ініціаторы громадной припомінкы підкреслюють, же закон о поставлїню народностных меншын є важным хыбуючім елементом сістемы охраны меншын на Словакії.

„Як правилно говорить Проґрамове выголошіня влады СР схвалене в роцї 2021, іде о єдно із средств спомалїня асімілації членів народностных меншын, і ґаранцію практікованя меншыновых прав выходячіх із Конштітуції СР. То, же не існує комплексный закон, запричінює тяжкости при практікованю прав народностных меншын і при формованю народностной політікы влады СР.“

Із спомянутых причін пропонує Інштітут Матєя Бела, вєдно із підписаныма партнерьскыма орґанізаціями а словацькыма обчанами, знова зарадити задачу схвалити закон о поставлїню народностных меншын до плану леґіслатівных задач влады Словацькой републікы.

Громадна припомінка

Громадна припомінка – то інштрумент, за помочі котрого люде можуть припомінковати пропозіції законів ці іншых правных приписів.

Мусить іти о єднозначно формуловану і выарґументовану пропозіцію на управу пропозіції конкретного правного припису. Може іти о пропозіцію нового тексту, управу існуючого тексту, доповнїня, зміну, выпущіня або уточнїня первістного тексту.

Покля громадну припомінку підпорить холем 500 особ, пак є передкладатель закона повинный їднати із представителями підписаных людей і орґанізацій. Покля сьте граждан Словацькой републікы, припомінку можете підписати за тым мотузком. Припомінку мож підписати лем до 28-го новембра.

Петро МЕДВІДЬ, ЛЕМ.фм. Ґрафічна і языкова коректура: АРК в СР.