26. 4. 2022: Формат З реґіонів до світа має помочі і Пряшівскому краю
Підпора бізнісовой сферы, сполупраца із загранічом і розвиток словацького експорту. То главный мотів події З реґіонів до світа, з котров Міністерство загранічных дїл і европскых справ Словацькой републікы пришло на два днї до Пряшівского самосправного краю (ПСК).
ПСК є по Нїтряньскім і Тырнавскім высшім теріторіалнім цїлку третїм за порядком, котрый є в рамках ініціатівы резорту діпломації зарахованый до формату ціклічных подій З реґіонів до світа. Цїлём є підпорити словацькый експорт і помочі домашнїм фірмам просадити ся в загранічу.
Представителї веце державных резортів, самосправы і публічного сектора в повязаню з тым діскутовали в понедїльок, 25-го апріля 2022-го року, в Пряшові в рамках округлого стола з малыма і середнїма подникателями, але і представителями академічной общіны а безпрофітового сектора.
„Наша актівность є заміряна на економічну діпломацію і маєме як резорт намагу одкрывати дверї і приходити з пропозіціями до окремых реґіонів Словакії, де хочеме помочі комуніковати главно з малыма, середнїма подникателями і мікрофірмами,“ повіла Інґрід Броцкова, державный секретарь Міністерства загранічных дїл і европскых справ Словацькой републікы. Як далше повіла, єдночасно хоче резорт діпломації творити можности і принагоды в загранічу. Не резортї за їй словами мають добры інштрументы, жебы посилнити бізніс і в рамках амбасад в 68 країнах світа знають інтеґровати і розвивати сполупрацу і партнерство. В Пряшівскім краю подля Броцковой резорт одкрывать і далшы темы. „Є то і коронакріза, так само ромска проблематіка і конфлікт на Українї, кедьже ПСК є на граніцї з Українов і мусить занимати ся з величезным тиском біженцїв.“
„Тота подія про Пряшівскый самосправный край барз вызначна. Іде історічно о першый такый формат, де стрїтили ся представителї резорту з краём і далшыма представителями освітнїх інштітуцій, але главно бізнісовой сферы, котра у нас ґенерує робочі місця. Покля буде сполупрацовати державна справа, реґіонална справа і містна самосправа, сьме на найлїпшій пути, жебы сьме над проблемами, котры нас траплять, звітязили,“ повів пряшівскый жупан Мілан Маєрьскый.
Як далше доповнив председа ПСК Маєрьскый, Пряшівскый край є єдным із тых, котры мають найвеце навщівників, кедьже на теріторії краю суть Высокы Татры, Полонины, много далшых природных і културных крас. Зато подля жупана край залужыть собі творїня робочіх місць, жебы ся одкрыли браны краю про загранічных турістів і тоту красу подарило ся „вывезти“ до заграніча.
Петро МЕДВІДЬ, ЛЕМ.фм. Ґрафічна і языкова управа: ред. АРК в СР.
