26. 5. 2022: Русиньске народне свято в Еделейні

Вседержавне русиньске самосправованя орґанізує в суботу, 28-го мая 2022-го року, Русиньске народне свято в Еделейні, недалеко Мішколця. Подія буде проходити в Авлї Ґрекокатолицькой школы святого Николая.

На русиньскім святї будуть участны і цїнны гостї, єпарха Мішколцьской ґрекокатолицькой єпархії владыка Атаназ Орос і Золтан Деметер, котрый є посланцём мадярьского парламенту. Посланець над подіёв перевязв покровительство.

В рамках події буде і удїлёвати Премія Антонія Годинкы, яку буде вручати председа Вседержавного русиньского самосправованя Віктор Крамаренко. Русины помолять ся і Паракліс, одправляти го буде владыка Атаназ.

В рамках кулурного проґраму будуть выступати Анна і Марія Бан, домашнїй Ансамбель народных танцїв Часта, як і Молодежный фолклорный ансамбель Русины.

Припоминаме, же в Мадярьску буде списованя жытелїв аж тот рік, кедже было перенесене з причіны пандемії. І тота подія має укрїпити русиньску комуніту, жебы записати собі в списованю жытелїв свою народность і материньскый язык.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.