26. 7. 2022: На градї в Старій Любовнї стрїтять ся потомкове маїтелїв

На Любовняньскім градї у четверь, 28-го юла 2022-го року, стрїтять ся потомкове трёх шлахтічных родів, котры в минулости град властнили.

Директор Любовняньского музея, під котрый град належыть, Далібор Микулик про аґентуру TASR пітвердив, же то про них велика подія, а нелем реґіоналного, але і цїлоевропского значіня, кедьже дотеперь така стрїча ниґда не подарила ся зорґанізовати.

„Конкретно іде о Любомірьскых, котры властнили град в роках 1593 аж 1745, од них бы мав прийти Ян Любомірьскый-Ланцкороньскый з Варшавы. Пак суть то Раісовы, котры властнили град у 19-ім столїтю, по мечі бы мав прийти потомок Дёрдь VI. Любловарі Раіс, котрый жыє в Мадярьску. Остатнїм представителём буде внук прінцезны Ізабелы і Яна Замойского, котры властнили град на переломі 19-го і 20-го столїтя аж до 1944-го року, Йозеф Михал Замойскый прийде із Мадріду,“ приближыв Микулик з тым, же вшыткы трьоми стрїтять ся пополудне в Крішталовій комнатї Палаца Любомірьскых.

Тоты три фамелії подля Микулика не овпливнёвали лем історію реґіону северного Спіша, дїяли і в Іспанії, на Сіцілії, Любомірьскы мали палаці і в Дресденї, Відню ці Празї.

„Ідею зорґанізовати тоту стрїчу маю вже десять років, но в остатнїм часї нам то все штось перервало. Теперь вже маєме потверджено, же у четверь прийдуть вшыткы,“ додав директор Любовняньского музея.

В рамках стрїчі потомкове уложать на градї часову скриньку з памятныма предметами, одбуде ся і літурґія в градній каплічцї, і в западнїм бастіонї заграють собі шахы із жывыма фіґурками.

„Буде і машкарный бал, градны славности, ночна переглядка, але основный є тот історічный момент, мати їх ту вшыткых на єднім місцї, што є выняткове в рамках европскых градів і замків,“ повів директор з тым, же подія одбуде ся в рамках проєкту УЗЕЛ  Стара Любовня – Місто културы 2021.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР.