26. 7. 2023: Одбуде ся громада Піттсбурґской митрополії

Ахієпіскоп і митрополіта піттсбурґскый владыка Вільям Шкурла і Рада єрархів Піттсбурґской візантійской католицькой митрополітной церькви буде гостити од 2-го до 5-го новембра 2023-го року 3-тю громаду Піттсбурґской митрополії.

Громада одбуде ся в Храмі Пречістой Дівы Марії в Гіллсборов, Ню Джерсї. Темов громады є Жыти нашу віру: Рушати ся допереду, цїнити наше минувше. Митрополітна громада буде роздїлена на темы про духовных, і темы про віруючіх лаіків.

Три цїлї

Як інформує офіціалный сайт митрополітной громады, слїдують ся три цїлї. По перше, звекшыти знаня і цїнити собі історію візантійской русиньской церькви в „Старім краю“ і в Споєных штатах Америкы, як і візантійску русиньску културу а уменя.

Другым цїлём громады є дізнати ся о провіреных поступах, котры днесь існують в парохіях Піттсбурґской митрополії, і котры помагають роснути комунітам віруючіх, з надіёв, же участны запровадять тоты практікы до своїх актівностей на парохіях.

Третім цїлём подля офіціалного сайту є зробити конкретны крокы, жебы забезпечіти будучность і роснутя тамтешной Церькви. Сінодална стрїча має тоты три темы за найважнїшы.

Прийдуть і вызначны гостї

Митрополітна громада, на котрій по реґістрації можуть брати участь і віруючі лаіци, буде мати інтересный проґрам і вызначных гостів.

Як інформує офіціалный сайт, културный аспект громады будуть представльовати презентації професора Павла Роберта Маґочія, котрый буде бісїдовати о основателях Візантійской католилцькой (ґрекокатолицькой) церькви в Америцї. Митрополія інформує, же ёго книжка Нашы люде: Карпатьскы Русины і їх потомкы в Северній Америцї (оріґ. Our People: Carpato-Rusyns and Their Descendants in North America) якраз вышла в новім розшыренім выданю.

Маґочій має презентовати і уменя а културу русиньского народа, причім орґанізатор авізує, же занедовго має быти выдрукована книга Маґочія о умелцях Підкарпатьской школы малёваня.

Отець Хрістофер Зуґґер буде занимати ся історіёв Візантійской католицькой церькви в Америцї. Слїдучій рік буде сто років од приходу Василія Такача, першого єпіскопа Візантійской русиньской католицькой церькви в Америцї.

Отець Зуґґер є автором двох книг, Забыты: Католици Совітьской імперії од Леніна через Сталіна і Гляданя скрытой Церькви. Ёго третя книга занимать ся історіёв Візантійской русиньской церькви од їй основаня аж по сучасность і выйде в новембрї того року.

Участным має быти і кардінал Тімоті Долан, римокатолицькый архієпіскоп ню-йорьскый, котрый має мати свій прояв на одкрываючій вечерї в пятніцю. Меджі оголошеныма гостями є і владыка Ніл Лущак, апостольскый адміністратор Мукачовской єпархії, котра є про нашы церьковны штруктуры, якы вышли з Ужгородьской унії, Матірёв Церьквов.

Образы і музика

Участны почас громады будуть годны відїти і збірку образів підкарпатьскых малярів, котру властнить Єпархія Пассаік. Позната в русиньскім русї актівістка Марія Сілвестрї буде кураторков той выставы, в рамках котрой буде мож відїти образы Адалберта Ерделія, Йосифа Бокшая і далшых.

Кедьже музика і танець мають вызначну роль в културній дїдовизнї карпатьскых Русинів, навщівници будуть мати можливость быти і на суботнім ґалавечорї, де не буде браковати музика ці традічны стравы. Заграти русиньскы співанкы прийде ґрупа Пайташы із Словакії.

Петро МЕДВІДЬ, ЛЕМ.фм, языкова і ґрафічна управа: АРК в СР.