26.5.2023: Мілан ҐАЙ: Послїдня вечеря, Стояло Дїтя на порозї (Стишкы)

Мілан Ґай

Послїдня вечеря

Мір свій вам давам – повів Хрістос

дванадцятём што слухали ёго

покій і несконана доброта

сіяла при поглядї на нёго.

 

Покоём наповняв він їх душы

а они хотїли быти із Хрістом

бо у тім часї щі не знав нихто

же то послїдня ніч з Ісусом.

 

Ісус ламав Хлїб перед нима

каждому із них подавав,

берте а їджте то моє тїло

тихыма словами їм казав.

 

І каждый натяг свої рукы

забрав фалаток, до рота клав,

лем Юда мілостёв Божов заскоченый

што уж план про зраду Ісуса мав.

 

Потїм чашу Ісус їм подав

рознесла ся арома вина,

по цїлім домі, а Ісус повів –

то кров моя – про вас єдина.

 

Бо тота кров пролїє ся за вас

приймийте чашу – то поміч у бідї

жебы вы світьсков славов правды

дотримовали мої заповідї.

 

Так ся Ісус Хрістос лучів із нима

бо быв то їх послїднїй вечур,

знав він, же тоту ніч прийдуть по нёго

і скровлять ёго плечі.

 

Мір свій я вам давам – тоты дорогы слова

довгы стороча нам звучать і днесь,

Тот Хлїб і тото Вино –

То ваша спаса із Небес.

 

 

Стояло Дїтя на порозї

Стояло Дїтя на порозї

перешло першый несмілый крок

сохраняй ёго, Боже, на дорозї

од злых людей, завістлых думок.

 

Вырастаме мы з люблячім сердцём

бо він нас спровадить каждый час

як найти до світа щастну дорогу

на якій Господь спровадить нас.

 

Mы стоїме на порогу вічности

і до незнама робиме першый крок,

господи, помож нам в дорозї

жебы мы щастны были по цїлый рок.