27. 10. 2022: Одбыло ся 34-те засїданя ОСРС. Платформа собі припомянула 10 років єствованя
21-го октобра 2022-го року в просторах Словацького народного музея – Музея русиньской културы в Пряшові одбыло ся 34-те засїданя Округлого стола Русинів Словакії. По довшім часї, котрый быв позначеный пандемёв, было засїданя презенчно, причім часть членів схосновала
онлайн форму участи.
ОСРС мав у проґрамі веце пунктів. Окрем іншого, собі членове припомянули і 10-ту рочніцю од основаня той платформы. З потїхов можеме по десятьох роках конштатовати, же ОСРС нелем фунґує, наповнює свої заміры і цїлї, але так само розростать ся, кедьже і на тім засїданю были привітаны новы індівідуалны і колектівны членове.
Оцїнка попереднёго періоду
Меджі важны пункты засїданя належало оцїнваня роботы ОСРС за три рокы, почас котрых вів платформу у функції председы Петро Штефаняк.
Зрекапітуловали ся актівности, котры членове почас того періоду зреалізовали. Меджі нима мож спомянути юбілейный Рік русиньского села, котрый мав быти приправов на кампань ку Списованю жытелїв, домів і квартелїв у 2021-ім роцї, і котрый быв успішный нелем меджі дорослыма, але і меджі дїтми, кедьже ся в повязаню з тым роком орґанізовали і різны конкурзы.
Штефаняк реферовав о вшыткых стрїчах представителїв ОСРС, котры одбыли ся в просторах Міністерства згаранічных дїл і европскых справ СР, Міністерства културы СР, Словацького народного музея ці RTVS, і на котрых все платформа мала намагу, до великой міры успішно, просаджовати інтересы русиньской народностной меншыны на Словакії, але одкрыла і темы прав Русинів на Українї.
До окремой увагы дістала ся оцїнка кампанї ку списованю жытелїв, а так само выслідкы, вдяка котрым чісло Русинів знова наросло і меншына собі заховала статус третёй найвекшой на Словакії, по Мадярах і Ромах.
Членове Выбору про народностны меншыны і етнічны ґрупы так само інформовали о дїятельстві того выбору, як і о сітуації односно приправы народностного закона а о далшій леґіслатіві, котра прямо дотулять ся меншыновых прав на Словакії.
Выберала ся нова презідія
На засїданю выберала ся і нова презідія. По трьёх роках скінчів функчный період председы, потребне было выберати і далшых членів презідії.
Функцію на другый трироічный період (послїдній можній) обгаїв дотеперішнїй председа Петро Штефаняк, котрый в попереднїм періодї успішно зреалізовав кампань ку списованю. Членами презідії ex offo як членове народностного выбору зістали Петро Медвідь (єдночасно потвердженый у функції говорцю) і Мілан Ян Піліп. Новым секретарём, єдночасно членом презідії, став Матуш Допіряк. За індівідуалных членів была до презідії выбрата довгорічна новинарька і актівістка Таня Рундесова, за колектівных членів Марек Гребік, котрый представлює орґанізацію молоды.Русины.
ОСРС продовжує в актівностях і хоче быти европскым партнером
ОСРС по десятёх роках успішной роботы продовжує у своїх актівностях. На своїм засїданю платформа зрушыла комісії, котры робили і приготовлёвали матеріалы в попереднїх роках, і выріїшыла їх креовати наново, причім буде ословлёвати і одбіорників, котры не суть членами, но можуть помочі при рїшіню окремых областей. Вже на пятніцёвім засїданю было схвалене веджіня і обсяговый замір про културну і языкову комісію. Штонайскорїше має рїшыти ся і комісія школьска.
За єден з найважнїшых і веце як 30 років невырїшеный вопрос поважує ОСРС роблематіку русиньской културной дїдовизны в збірковім фонді СНМ – Музея україньской културы у Свіднику. З цїлём рїшыти тоту проблему буде платформа в найблизшім часї реалізовати далшы крокы.
Так само членове ОСРС на засїданю повірили презідію, жебы зачати їднати о вступі до єдной із вызначных европскых меншыновых орґанізацій. ОСРС має інтерес стати в рїшіню вопросів русиньской меншыны европскым партнером і мати вдяка такому членству досяг на політічны фракції Европского парламенту, котры меншыновыма вопросами занимають ся.
Петро МЕДВІДЬ, ЛЕМ.фм. Ґрафічна і языкова коректура: АРК в СР.
