27. 10. 2023: Папа Франціск призначів єромонаха Йону (Йосифа) Максима за нового пряшівского архієпіскопа і митрополіту

Святїшый Отець Франціск у четверь, 26-го октобра 2023-го року, на свято великомученика Димитрія, выменовав нового пряшівского архієпіскопа і митрополіту Ґрекокатолицькой церькви на Словакії.

Став ним єромонах Йона (Йосиф) Максим, дотеперїшнїй іґумен монастыря студітів в Унівскій лаврї. Єромонах Йона походить із русиньского села Ольшавіця, в окресї Левоча. Владыка Петро Руснак зіставать апостольскым адміністратором на выконованя звычайной аґенды аж до перевзятя канонічных властей архієпархії новым єпіскопом.

Біоґрафія нового митрополіты

Єромонах Йона народив ся як Йосиф Максим 21-го новембра 1974-го року в Левочі, дїтинство пережыв у Ольшавіцї.

По ґімназії ішов штудовати на втогдышню Ґрекокатолицьку богословску (днесь теолоґічну) факулту в Пряшові. У 1998-ім роцї здобыв тітул маґістра теолоґії і в тім самім роцї почав штудовати на Папскім восточнім інштітутї в Римі, де в роцї 2000 здобыв ліценціат, а в роцї 2017 докторат із восточных церьковных штудій.

На священика быв рукоположеный 11-го юла 1998-го року владыком Йоаном Гірком в Пряшові. В роках 2001 аж 2004 быв шпірітуалом у Священьскій семінарії блаженого єпіскопа Павла Петра Ґойдіча в Пряшові, а в роках 2002 аж 2004 і асістентом на Катедрї сістематічной теолоґії Ґрекокатолицькой теолоґічной факулты в Пряшові.

У 2004-ім роцї одышов на Україну і вступив до Унівской лавры. По закінчіню новіціату там склав вічны монашескы обіты 22-го мая 2008-го року. У 2011-ім році быв выбратый за іґумена філіалного монастыря у Львові, і в роцї 2020 за іґумена Унівской лавры.

Вертам домів, меджі своїх найблизшых

„Выменованя за пряшівского архієпіскопа і митрополіту ня застигло на Українї, де дїю уж майже 20 років. Тото выменованя поважую за прояв великой довіры з боку Церькви і Святїшого Отця Франціска, як і за прояв ёго прихыльности ку Ґрекокатолицькій церькви на Словакії. Приймам то з покоров і слухняностёв,“ пише новый митрополіта у своїм писемнім выражіню.

Владыка номінант подяковав владыкови Петрови Руснакови, котрый веце як рік вів Пряшівску архієпархію як апостольскый адміністратор, причім зістав і братїславскым єпархом. Так само подяковав владыкови Кірілови Василёви а владыкови Міланови Лахови, як і вшыткым емерітным єпіскопам.

„Вертам домів на Словакію, де мам свою родину, сполубратів священиків і віруючіх, з котрыма хочу продовжовати в будованю того, што почали мої попердници. Чую ся як отець, котрый по роках прожытых в чуджінї з причіны повинностей вертать домів меджі своїх найблизшых, жебы тїшыв ся із їх успіхів, тїшыв їх в болях і слухаючі голос Святого Духа їх допроводив у гляданю Божой правды,“ пише далше новый митрополіта.

Як інформовав, выменованя го застигло в службі іґумена Унівской лавры, зато ёго приход на Словакію іщі выжадує даякый час, жебы забезпечіти ход монастыря і найти нового іґумена.

Владыка Петро позывать ку вдячности і радости

„Roma locuta, causa finita – Рим ся высловив, дїло закінчене,“ высловив ся владыка Петро Руснак, дотеперішній апостольслый адміністратор Пряшівской архієпархії і братїславскый єпарха.

„Я вдячный Святїшому Отцёви Франціскови, же выменованьом нового пряшіваского архієпіскопа митрополіты закінчів час очекованя і давать нам у владыкови – номінантови можливость нового початку. Вєдно з нововыменованым пряшівскым архієпіскопом митрополітом Йоном Йосифом Максимом хочеме цїла Ґрекокатолицька митрополітна церьков sui iuris на Словакії выкрочіти з обновленов надіёв на стрїчу з Хрістом,“ высловив ся владыка Петро.

Владыкови Йонови із сердця заґратуловав, вітать го меджі єпіскопами і тїшыть ся на сполупрацу. „В ёго особі нам Господь давать доброго пастыря, зато вшыткых позывам ку вдячности і радости, як і ку молитвам за нововыменованого владыку.“

Друый пряшівскый архієпіскоп і митрополіта

Новый владыка Йона (Йосиф) Максим став за порядком другым пряшівскым архієпіскопом і митрополітом.

30-го януара 2008-го року Вселеньскый Архієрей Венедікт XVI. реорґанізовав Ґрекокатолицьку церьков на Словакії на митрополітну церьков sui iuris із центром в Пряшові. За першого пряшівского архієпікопа і митрополіту выменовав довтогдышнёго пряшівского єпарху Йоана Бабяка. Інтронізованый быв 17-го фебруара 2008-го року в Пряшові.

25-го апріля 2022-го року Папа римскый Франціск прияв зречіня ся пастырьского ряджіня Пряшівской архієпархії архієпіскопом і митрополітом Йоаном Бабяком, і за апостольского адміністратора пряшівского архієпархії призначів братїславского єпарху Петра Руснака. Тот по інтронізації нового митрополіты верне до Братїславской єпархії.

Петро МЕДВІДЬ, ЛЕМ.фм, языкова і ґрафічна управа: АРК в СР