27. 3. 2023: Загальне зобраня членів Руской Бурсы в Ґорлицях

Каждый рік, а тым разом было то 25. марця 2023 рока, в Ґорлицях зберают ся члены Стоваришыня Руска Бурса на загальным зобраню, котре за ціль має підсумувати діяльніст общества за влонишній рік, накрислити текучы і будучы проблемы та выбрати новы власти орґанізациі.

То перша стріча в послідніх роках, яка одбыла ся в гейбы нормальных обставинах – по пандемічным періоді, початку войны на Украіні, макроекономічных перемінах, влияючых на діяльніст каждой орґанізациі, може і даде видиме даяку стабілизацию, хоц треба доповісти, же новых бід і старунків не бракує.

Формальны обовязкы

Кажде стоваришыня, жебы могло діяти, мусит дополнити правно-формальны стороны свойой діяльности. Так і бурсакам были представлены справописы (мериторичный, фінансовый і од Ревізийной Комісиі), а пак члены стоваришыня дали абсолюторию одходячому зарядови.

Выслухавшы мериторичный (але і тот фінансовый) справопис, підкрислити треба, же хоц часы планны, то Руска Бурса іде фурт допереду, розвиват ся, а окрем підтримуваня актуальных – навязує і новы контакты. Приміром того може быти участ членів Стоваришыня (в тым і редакторів діючых під ним медий ЛЕМ.фм) в вельох русиньскых і нерусиньскых ініциятивах не лем в Польщы, але і поза єй границями (Словация, Мадяры, Сербія, Украіна), што тіж доказує довіря членів, жебы выбрати дотеперішній заряд враз з його ведучом, координуючом діяльніст общества, на наступну каденцию в незміненым складі.

Зато і заряд общества, на котрого челі рішыньом присутных дальшый уж раз станула Наталия Малецка-Новак, до наступного загального зобраня остає подібный. Разом з ведучом дополняют го Олена Дуць, Павел Малецкій, Адам Шевчык, Андрий Трохановскій і Даміян Трохановскій.

Новы акциі і пляны на будуче

При бесіді над формально-правныма справами, бурсакы бесідували тіж о текучых і плянуваных активносятх. А то не лем о актуально веденых ґрантах і проєктах, але тіж о тых, што іх мало бы ся реализувати о рік, о три, ци о пят років. Тото тіж тішыт, бо хоц псы фурт брешут, мы і так ідеме своім путьом.

Петро МЕДВІДЬ, ЛЕМ. фм, языкова і ґрафічна управа: АРК в СР.